سوننەکان لەبارەی پۆستی سەرۆکی پەرلەمان کۆدەبنەوە

ئاڤا نیوز

ئێوارەی ئەمڕۆ ئەنجوومەنی سیاسیی نیشتیمانی (سوننەکان) لە نووسینگەی محەممەد حەلبوسی، سەرۆکی حیزبی تەقەدووم لە بەغدا کۆدەبێتەوە، لە کۆبوونەوەکەدا یەکلاییکردنەوەی پۆستی سەرۆکی پەرلەمان و داواکارییەکانی سوننەکان لە حکومەتی داهاتووی عێراقدا تاوتوێ دەکرێن.

وێنە گەورەکە: زۆرینەی لایەنە سونییەکان لەناو هاوپەیمانێتییەک بەناوی ئەنجوومەنی سیاسیی نیشتیمانی خۆیان ڕێکخستووە و هەموویان پێکەوە خاوەنی 77 کورسین، بۆ پۆستی سەرۆکی پەرلەمانیش شەش کاندیدیان دیارییکردووە، ئەوانیش بریتین لە محەممەد حەلبووسی، سەرۆکی حیزبی تەقەدووم، محەممەد تەمیم، وەزیری پلاندانانی عێراق، سابت عەباسی، وەزیری بەرگری عێراق، موسەننا سامەڕایی، سەرۆکی هاوپەیمانیی عەزم،  لەگەڵ پەرلەمانتاران سالم عیساوی و مەحموود قەیسی.

زانیاریی بەدەستهاتوو: سەرکردەیەکی هاوپەیمانی عەزمی سوننەکان کە موسەننا سامەرائی سەرۆکایەتی دەکات، بە ئاڤای ڕاگەیاند، کاتژمێر 07:00ـی ئێوارەی ئەمڕۆ ئەندامانی ئەنجوومەنی سیاسیی نیشتیمانی لە نووسینگەی محەممەد حەلبووسی کۆدەبنەوە، لە کۆبوونەوەکەشدا باسی داواکارییەکانی سوننە و شایستەکانیان لە حکوومەتی داهاتووی عێراق دەکرێت.

ئاماژەی بەوەشکرد، هەر لەو کۆبوونەوەیەدا پۆستی سەرۆکی پەرلەمانیش یەکێکی دیکە لەتەوەرەکان دەبێت.