ئۆجەلان: کورد و تورک ناتوانن بەبێ یەکتر بژین و من خزمەتی دەوڵەتی تورکیا دەکەم

ئاڤا نیوز

 

عەبدوڵڵا ئۆجەلان لە کۆبوونەوەی لەگەڵ شاندی کۆمیسیۆنە پەرلەمانییەکەی تورکیا جەختی لەوە کردووەتەوە پەکەکە دەبێت هەموو چەکەکانی دابنێت، نەک تەنیا ئەو چەکانەی بە دەستییەوەن و گوتوویەتی, لەم جوگرافیایەدا کورد بەبێ تورک و تورک بەبێ کورد ناتوانێت بژی.

 

چیرۆکی سەرەکی: لە کاتیکدا چاوەڕێ دەکرا ئەمڕۆ 4-12-2025 لە 19مین کۆبوونەوەی کۆمیسیۆنی یەکڕیزیی نیشتمانی، برایەتی و دیموکراسی ناوەڕۆکی کۆبوونەوەکەی شاندە سێ ئەندامییەکەی کۆمیسیۆنەکە بخوێنرێتەوە کە 11 ڕۆژ لەمەوبەر لەگەڵ ئۆجەلان ئەنجامیان دابوو، بەڵام تەنیا پوختەکەی لەلایەن ئەحمەد بۆزکورت، یاریدەدەری سکرتێری پەرلەمانی تورکیا خوێنرایەوە.

 

بڵاوکراوەی فەرمی: ئۆجەلان لە کۆبوونەوەکەدا جەختی لەوە کردووەتەوە وەک ڕۆژی یەکەم پێداگیرە لەسەر قسەکانی بۆ سەرخستنی پرۆسەی ئاشتی و ئەگەر هەلومەرج بڕەخسێنرێت قسەکان دەبن بە کردار و باسی لەوە کردووە خۆی کەسێکی کاریگەرە لە سووریا و عێراقیش.

 

- ئۆجەلان ئاماژەی بەوە داوە کە دەوڵەتی تورکیا دەوڵەتی هەموویانە و جەختی لەوە کردووەتەوە کە ئەویش "ئامادەیە بۆ خزمەتی دەوڵەتی تورکیا" و ئاماژەی بەوە داوە ڕێز لە کەسوکاری سەربازە کوژراوەکانی تورکیا دەگرێت. کوژرانی هەر یەکێک لەوانیشی بە "تراژیدیا" ناو بردووە. باسی لەوەش کردووە بە تێپەڕینی کات گومانەکانی ڕای گشتی لەسەر پرۆسەکە دەڕەوێنەوە.

 

- ئۆجەلان ئاماژەی بەوە دا تورکیا هەنگاوی کردەیی دەنێت بۆ سەرخستنی پرۆسەکە، خۆی سەرۆکی پەکەکەیە و ڕێنمایی دەدات بە سەرجەم ئەندامانی ڕێکخراوەکە لە هەر کوێیەکی ناوچەکە بێت و باسی لەوە کردووە ئەوەی لە توانایدا بێت دەیکات بۆ سەرخستنی پرۆسەکە.

 

- لە وەڵامی پرسیاری ئەندامانی شاندەکەدا، ئۆجەلان جەختی لەوە کردووەتەوە کە داوای دەوڵەتی سەربەخۆ، فیدراڵی و مافی کولتووری ناکەن لە تورکیا.

- ئۆجەلان ئاماژەی بەوە دا کە لە 1993ەوە بە پێویستی زانیووە پەکەکە هەڵبوەشێنێتەوە، بەڵام تەواوی ئەو هەوڵانە لەبار بران کە پێشتر بۆ سەرخستنی پرۆسەی ئاشتی نران.

- ئۆجەلان ئاماژەی بەوە داوە مەزڵوم عەبدی کەسێکی نزیکە لێیەوە، لەگەڵ دەوڵەتێکی یەکگرتوو و یونیتەر و دیموکراتیی خۆجێی بۆ سووریا و بە پێویستیشی زانیووە هەسەدە پابەند بێت بە ڕێککەوتنی 10ی ئادار و تێکەڵبوونی هەسەدە لەگەڵ ئیدارەی نوێی سووریا.