لە سنووری سووریا و عێراق بارهەڵگرێک و کۆگایەکی چەک دەکرێنە ئامانج

ئاڤا دیجیتاڵ

لەلایەن فڕۆکەیەکەوە کە "پێدەچێت ئەمریکی بێت" هێرشێکی ئاسمانی کرایە سەر بارهەڵگرێک و کۆگایەکی چەکی گرووپە چەکدارەکانی نزیک لە ئێران لە سنووری سووریا و عێراق، بەو هۆیەوە پێنج چەکدار کوژراون و برینداربوون.

چیرۆکە سەرەکییەکە: رۆژی سێشەممە 23-1-2024، جارێکی دیکە لە ناوچە سنوورییەکانی سووریا و عێراق گرووپە چەکدارەکانی سەر بە ئێران کرانە ئامانج، کە جوڵەیان بە چەک و کەلوپەلی سەربازی کردووە لە سنووری هەردوو وڵاتەکەدا.

لێدوانی فەرمی: لە نزیک شاری ئەلبوکەمال لە رۆژهەڵاتی پارێزگای دێرەزووری سووریا، کە دەکەوێتە سەر سنووری عێراق و سووریا، لە لایەن فڕۆکەیەکەوە کە پێدەچێت ئەمریکی بێت، هێرشکراوەتە سەر بارهەڵگرێکی چەک و کۆگایەکی چەکی گرووپە چەکدارەکانی نزیک لە ئێران، بەو هۆیەوە دوو چەکدار کوژراون کە سووری نین و سێ چەکداری دیکەش برینداربوونە. ڕەوانگەی سووری بۆ مافەکانی مرۆڤ وا دەڵێت.

ئەوەی پێویستە بزانیت: بەهۆی جەنگی غەزەوە و پشتگیری ئەمریکا لە ئیسرائیل، گرووپە چەکدارەکانی سەر بە ئێران لە عێراق، سووریا، لوبنان و یەمەن، لەژێر ناوی پاڵپشتی لە غەزە تاوەکو ئێستا دەیان هێرشی مووشەکی و درۆنییان کردوونەتە سەر بنکەکانی ئەمریکا لە ناوچەکە، بەو هۆیەوە چەندین سەربازی ئەمریکی برینداربوونە.

ژمارەکان وادەڵێن: بەپێی کۆتا ئامارەکانی وەزارەتی بەرگری ئەمریکا لە 17 ئۆکتۆبەری ساڵی ڕابردووەوە 151 جار هێزەکانیان لە عێراق و سوریا کراونەتە ئامانج.

باکگراوند: لە دوای دەستپێکردنی جەنگی ئیسرائیل و حەماس، تاوەکو ئێستا هێزە ئاسمانییەکانی ئەمریکا بەلایەنی کەمەوە 15 هێرشی ئاسمانییان لە ناوچەکانی ژێر دەسەڵاتی گرووپە چەکدارەکانی نزیک لە ئێران لە دێرەزوور ئەنجامداوە، پێگە و خاڵ و کۆگەی سەربازی چەک و تەقەمەنیان کردووەتە ئامانج، بەو هۆیەوەش 27 چەکدار کوژراون.