دەوڵەتی یاسا: سزادانی حیزبوڵڵا و حووسییەکان خواستی ئەمریکایە

ئاڤا نیوز

لە یەکەم کاردانەوەی هاوپەیمانیی دەوڵەتی یاسا بە سەرۆکایەتیی نووری مالیکی سەبارەت بە بڕیاری بلۆککردنی سەرمایە و پارەی حیزبوڵڵای لوبنانی و حووسییەکانی یەمەن، وتەبێژی هاوپەیمانییەکە هێرشێکی تووند دەکاتە سەر محەممەد شیاع سوودانی.

چیرۆکی سەرەکی: ڕۆژی پینجشەممەی ڕابردوو 6-12-2025 دوای چەند کاتژمێرێک لە بڕیارێکی حکومەت و بانکی ناوەندی عێراق  بە ناساندن و پۆلێنکردنی حیزبوڵڵای لوبنانی و حووسییەکانی یەمەن وەک دوو ڕێکخراوی تیرۆریستی تێپەڕی و تێیدا بڕیاری بلۆککردنی سەرجەم سامان و پارە و موڵکەکانیانیش درابوو، هەردوولا لە بڕیارەکە پاشگەز بوونەوە.

لێدوانی فەرمی: عەقیل فەتلاوی، گوتەبێژی دەوڵەتی یاسا ڕایگەیاند: بڕیارەکەی سوودانی سەبارەت بە بلۆککردنی سەرجەم سامان و پارە و موڵکەکانی حیزبوڵڵای لوبنان و حووسییەکانی یەمەن بە سەهو یان بە هەڵە دەرنەچووە، بەڵکو ئامانج لێی ڕازیکردنی لایەنی ئەمەریکی بووە.

زانیاریی زیاتر: فەتلاوی ئاماژەی بەوەشکرد، سوودانی ویستوویەتی لەم ڕێگەیەوە،  ئەمەریکا فشار لە چوارچێوەی هەماهەنگی بکات،  تاوەکو ڕازی بن ویلایەتی دووەمی بۆ تازە بکەنەوە، جەختیشی کردەوە کە خەونی سوودانی بۆ وەرگرتنەوەی پۆستی سەرۆکوەزیران یان هەر پۆستێکی باڵای دیکە لە دەوڵەتی عێراقدا کۆتایی هاتووە .