سەرۆکایەتیی کۆماری عێراق: ئاگاداری بڕیاری بە تیرۆر ناساندنی حیزبوڵڵا و حووسییەکان نین

ئاڤا نیوز

سەرۆکایەتیی کۆماری عێراق ڕەتیدەکاتەوە واژۆی لەسەر بڕیاری بە تیرۆریست ناساندنی حیزبوڵڵا و ئەنساروڵڵا (حوسییەکان) کردبێت و دەڵێت، تەنیا لە سۆشیال میدیاوە هەواڵەکەیان بیستووە و ئەو جۆرە بڕیارانە پەیوەندی بەوانەوە نییە.

چیرۆکی سەرەکی: لە هەنگاوێکی بێ پێشینەدا و بەتاوانی کاری تیرۆرستی، لیژنەی ڕووبەڕووبوونەوەی سیپیکردنەوەی پارە و پارەدارکردنی تیرۆری سەر بە حکومەتی عێراق سزای بەسەر حیزبوڵڵای لوبنان و حووسییەکانی یەمەندا سەپاند و بڕیاری بلۆککردنی سەرجەم سامان و پارە و موڵکەکانیانی دەرکرد، بەڵام دواتر پاشگەز بووەوە.

لێدوان فەرمی: فەرمانگەی ڕاگەیاندنی سەرۆکایەتیی کۆمار ڕایگەیاند، نە ئاگادارین و نە پەسەندی بڕیاری بە تیرۆریست ناساندن و سڕکردنی پارەی ئەو دوو گرووپەمان کردووە. بڕیاری لەو شێوەیە بۆ ئێمە نانێردرێت، تەنیا ئەو یاسایانە بۆ سەرۆکایەتیی کۆمار دێن بۆ وردبینی و پەسەندکردن کە پەرلەمان دەنگی لەسەر داون، لەگەڵ مەرسوومە کۆمارییەکان.

لە هەمانکاتدا: سەرۆکایەتییەکە ڕوونیکردەوە کە بڕیارەکانی ئەنجوومەنی وەزیران، بڕیارەکانی لیژنەی سڕکردنی پارەی تیرۆریستان، لیژنەی سپیکردنەوەی پارە و ڕێنمایی لایەنەکانی دیکە، ڕەوانەی سەرۆکایەتیی کۆمار ناکرێن و ئەوان دەسەڵاتی پەسەندکردنیان بەسەر ئەو جۆرە بڕیارانەدا نییە.