لە پارکی سامی عەبدولڕەحمان فێستیڤاڵی تایبەت بە خواردنە کوردەوارییەکان کراوەتەوە

ئاڤا نیوز

لە هەولێر فێستیڤاڵی شێفەکان بۆ خواردنە کوردەوارییەکان، بە بەشداری شێفە بەتواناکانی شار و شارۆچکە جیاوازەکانی هەرێمی کوردستان، لە دوێنێوە دەستی پێکردووە و سبەینێش بەردوام دەبێت.

چیرۆکی سەرەکی: گروپی جاجم بۆ چالاکییە هونەری و کولتوورییەکان بەهەماهەنگی لەگەڵ فەرمانگەی پارکی سامی عەبدولڕەحمان، فێستیڤاڵی شێفەکانیان کردووەتەوە.

لێدوانی فەرمی: جەمیل حوسێن، بەڕێوەبەری فەرمانگەی پارکی سامی عەبدولڕەحمان، بە ئاڤای ڕاگەیاند، ئامانج لەو فێستیڤاڵە ڕەخساندنی هەلی کار و ناساندنی خواردنە کوردەوارییەکانە، لەلایەن گەشتیارانەوە پێشوازییەکی گەرم لە فێستیڤاڵەکە دەکرێت و جمەی دێت.

زانیاریی زیاتر: فێستیڤاڵەکە لە کاتژمێر 2:00ـی دوای نێوەڕۆوە تا کاتژمێر  11:00ـی شەو بەردەوام دەبێت و لە ژێر 80 کەپری فێستیڤاڵەکەدا خواردنە کوردەوارییەکانی وەک کەلانە، دۆڵمە، دۆغەوا، دۆینە، کوبە، بریانی و کفتە و چەندین جۆر خواردن و خواردنەوەی دیکە پێشکەشکراون، چەند کەپرێکیش کارە دەستییەکانی خانمانییان تێدا نمایش کراوە.