ئەمساڵ داعش 227 هێرشی بۆسەر ڕۆژئاوای کوردستان کردووە

ئاڤا نیوز

ئامارەکانی ڕوانگەی سووری بۆ مافەکانی مرۆڤ دەریدەخات، لەماوەی 11 مانگی ئەمساڵدا چەکدارانی داعش بە سوودوەرگرتن لە بۆشایی ئەمنی توانیویانە 227 هێرش بۆسەر هێزەکانی سووریای دیموکرات بکەن.

وێنە گەورەکە: لە ساڵی 2014 ـەوە چەکدارانی داعش بەشێوەیەکی فراوان لە سووریا ئامادەییان هەیە، ئێستا بە سوودوەرگرتن لەو ناوچانەی هیچ هێزێکی لێ نییە، بە تایبەت لە ڕۆژئاوای فورات، ڕۆژانە کردەوەی تیرۆرستی ئەنجام دەدەن.

ڕاگەیێنراوی فەرمی: ڕوانگەی سووری بۆ مافەکانی مرۆڤ ڕایگەیاند، بە سوودوەرگرین لە سەختی هەڵکەوتەی جوگرافی هەندێ ناوچە، چەکدارانی داعش توانیویانە لە ڕێگای کەمین، دانانەوەی تەقەمەنی، هێرشی لەناکاو و هەڕەشە لە خەڵک لەماوەی ئەمساڵدا 227 هێرش بۆسەر هێزەکانی سووریای دیموکرات ئەنجام بدەن.

ژمارەکان وا دەڵێن: داتاکانی ڕوانگەی سووری بۆ مافەکانی مرۆڤ ئەوەی دەرخستووە بەهۆی هێرشەکانەوە 98 کەس کوژراون، لەو ژمارەیە 69 کەسیان ئەندامانی هێزەکانی سووریای دیموکرات بوون. لە کۆی ئەو هێرشانەی کراون، 196 هێرشیان لە ناوچەکانی دێرەزوور بوون و ئەوانی دیکە لە ناوچەکانی وەک ڕەققە و حەسەکە کراون.