ئیتلاعاتی ئێران چوار هاووڵاتیی بۆكان بێسەروشوێن دەكات

ئاڤا نیوز

هێزەكانی ئیتلاعاتی سوپای پاسداران، چوار هاووڵاتیی بۆكان بە زەبری هێز و بە بەكارهێنانی تووندوتیژی دەستگیر دەكەن، بەپێی زانیارییەكانی ڕێكخراوەكانی داكۆكیكار لە مافەكانی مرۆڤ، تا ئێستا هۆكاری دەستگیركردن و چارەنووس و شوێنی گرتنیان نەزاندراوە.

بڵاوكراوەی فەرمی: ڕێكخراوی هەنگاو كە گرنگی بە پرسەكانی مافەكانی مرۆڤ دەدات لە ئێران و ڕۆژهەڵاتی كوردستان، دەستگیركردنی چوار هاووڵاتیی شاری بۆكانی ڕۆژهەڵاتی كوردستانی بڵاوكردەوە، كە لەلایەن هێزەكانی ئیتلاعاتی سەر بە سوپای پاسدارانەوە بە بەكارهێنانی هێز و توندوتیژی، لەنێو ماڵەكانیان دەرهێنراون و بۆ شوێنێكی نادیار گواستراونەتەوە.

- ڕێكخراوی هەنگاو ئەوەشی بڵاوكردووەتەوە، هەریەك لە سولەیمان ئیسماعیلی، دیار حاجی ڕەسووڵپوور، دیان ڕەسووڵپوور و ئەحمەد زرینگ، ئەو هاووڵاتیە کوردانەی خەڵکی شاری بۆکانن كە لەلایەن هێزەكانی ئیتلاعاتەوە قۆڵبەست كراون، هاوكات دەستیشگیراوە بەسەر كەلوپەلە تایبەتەكانیان وەكو مۆبایل و كتێبەكانیان، لەكاتی هەڵكووتانە سەر ماڵەكانیان، دەرگای خانووەكانیان شكاندوون و دەوروبەری ئەو شوێنەشیان پشكنیوە.

ئەوەی پێویستە بیزانیت: دەستگیركردنی ئەو چوار هاووڵاتیە كوردەی بۆكان لەكاتێكدایە، دەستگیركردنی چالاكوانان و گەنجانی ڕۆژهەڵاتی كوردستان لە ڕۆژانی ڕابردوودا زیادی كردووە؛ چەند ڕۆژ لەمەوبەریش، پێنج كەس لە شاری شنۆ دەستگیركراون، هەروەها لە ئورمیە و كامێران و دیواندەرە و مهاباد، چەندین هاووڵاتیی كورد دەستگیر كراون.