سەرژمێریی نوێ؛ هەڕەشە بۆ سەر ناسنامەی کوردستانی بوونی کەرکووک

ئاڤا نیوز

وەزارەتی پلاندانانی عێراق بە پێچەوانەی ڕێککەوتنی سیاسیی نێوان هەولێر و بەغدا و بڕیاری ئەنجوومەنی وەزیران، ڕاستاندنی بۆ ئەنجامی سەرژمێریی ساڵی 2024 کردووە بەبێ ئەوەی بەراوردکاری لەگەڵ سەرژمێری ساڵی 1957 بکرێت؛ ئەمەش مەترسیی شەرعیەتدانی بە پڕۆسەی تەعریب و سڕینەوەی بەهای سەرژمێری 1957 لای کورد لە ناوچە کوردستانییەکانی دەرەوەی ئیدارەی هەرێمی کوردستان دروستکردووە.

 

ئەوەی پێویستە بیزانیت: بڕیارە لە چەند ڕۆژی داهاتوودا وەزارەتی پلاندانان تەواوی تۆمار و داتاکانی سەرژمێریی 2024 ڕەوانەی کەرکووک بکات بۆ جێبەجێکردن.

 

کاریگەری و لێکەوتەکان: مەترسییە سەرەکییەکە ئەوەیە کە بەهۆی مانەوەی ئاسەواری تەعریب و هاتنی هەزاران خێزانی عەرەب بۆ ناوچە کوردستانییەکان، ئەم سەرژمێرییە نوێیە ببێتە تۆمارێکی فەرمی و هەڕەشە لەسەر ناسنامەی کوردستانیی بوونی کەرکووک دروست بکات، بەمەش سەرژمێری 1957 کە تاکە دۆکیۆمێنتە بۆ جێبەجێکردنی ماددەی 140، فەرامۆش بکرێت.

لەلایەکی دیکە: لە بەرامبەردا، پارێزگاری کەرکووک جەختی کردەوە کە بۆ پرسە دیمۆگرافییەکان تەنها کار بە سەرژمێری ساڵی 1957 دەکەن و سەرژمێرییە نوێیەکە تەنها بۆ بوارەکانی ژێرخان و بووژانەوە بەکاردەهێنرێت. جێی وەبیرهێنانەوەیە بڕیاربوو بەپێی بڕیاری 5ی 11ی ساڵی ڕابردووی ئەنجوومەنی وەزیران، بەراوردکاری لەنێوان هەردوو سەرژمێرییەکەدا بکرێت بەر لە پەسەندکردنی.