لە زاخۆ پێشانگەی نێودەوڵەتیی کتێب کۆتایی دێت؛ قوتابیان پشکی شێری سەردانیکردن و کڕینیان بەرکەوت

ئاڤا نیوز

ئەمڕۆ  شەممە یەکەمین خولی پێشانگەی نێودەوڵەتیی کتێب لە زاخۆ کۆتایی دێت، کە تێیدا قوتابیان وەک سوودمەندی سەرەکی و کڕیاری ژمارە یەکی کتێبەکان دەرکەوتن و ڕۆژانە جموجۆڵێکی گەرمیان لە هۆڵەکانی پێشانگەکەدا دروست کردبوو.

چیرۆکی سەرەکی: پێشانگەکە بۆ ماوەی شەش ڕۆژ بەردەوام بوو، تێیدا 65 دەزگای چاپ و بڵاوکردنەوە لە 10 وڵات و هەر چوار پارچەی کوردستانەوە بەشدار بوون. لەو ماوەیەدا، ڕۆژانە زیاتر لە 10 ناوەندی خوێندن (لە قۆناغەکانی بنەڕەتی، ئامادەیی، پەیمانگە و زانکۆکان) بە شێوەی گرووپ سەردانیان دەکرد، کە بەشێکیان لە دەرەوەی شاری زاخۆوە هاتبوون.

ئەوەی لەبارەیەوە دەگوترێت: ئامەد فازڵ، وەک قوتابییەک ئاماژەی بەوە کرد کە ئەم پێشانگەیە دەرفەتێکی زۆر باش بوو بۆ قوتابیان تاوەکو سەرچاوە زانستی و ئەکادیمییەکان بەدەست بهێنن و کتێبخانەکانیان دەوڵەمەند بکەن.