سەرۆکوەزیرانی قەتەر: جەنگی غەززە بێ کشانەوەی تەواوەتیی ئیسرائیل کۆتایی نایەت

ئاڤا نیوز

شێخ محەممەد بن عەبدولڕەحمان ئال سانی، سەرۆکوەزیران و وەزیری دەرەوەی قەتەر ڕایگەیاند: ئاگربەستی تەواوەتی دەستەبەر نابێت بەبێ کشانەوەی ئیسرائیل لە کەرتی غەززە.

چیرۆکی سەرەکی: سەرۆکوەزیرانی قەتەر لەگەڵ هاکان فیدان، وەزیری دەرەوەی تورکیا و خۆسێ مانوێل ئەلڤارێز، وەزیری دەرەوەی ئیسپانیا لە پانێڵێکی تایبەت لە کۆڕبەندی دەوحە 2025 قسەیان کرد، هەموویان جەختیان لە بەردەوامیی ئاگربەست و دامەزراندنی دەوڵەتی سەربەخۆی فەلەستین کردەوە.

لێدوانی فەرمی: سەرۆکوەزیرانی قەتەر لە پانێڵەکەدا  ڕایگەیاند: "ئەو هەوڵانەی بۆ ئاگربەست لە غەززە دراون بۆ دوو قۆناغی سەقامگیری و دامەزراندنی دەوڵەتی فەلەستین پێویستن و ململانێکان تەنیا لە غەززە سنووردار نییە، بەڵکو کەناری ڕۆژئاواشی گرتووەتەوە، ناوبراو هیوای خۆی بۆ هاوکاری لەگەڵ حکوومەتی ئەمریکا بۆ گەیشتن بۆ بەدیهێنانی خواستەکانی فەلەستینییەکان بۆ بوونیادنانی دەوڵەتەکەیان دەربڕی.

لە درێژەی قسەکانی، ئال سانی وتی: دانوستان دەکەین بۆ داڕشتنی ڕێرەوێک بۆ قۆناغی داهاتوو، ئێمە لە قۆناغێکی گرینگداین و ڕێککەوتنەکە سەبارەت بە غەززە بە تەواوی جێبەجێ نەکراوە، ئاماژەی بەوەشکرد، "ڕۆڵی قەتەر دڵنیابوونە لە بەردەوامیی گفتوگۆکان و ئەنجامەکانی ئەرێنی و بوونیادنەرن".

ئەوەی پێویستە بیزانیت: کۆڕبەندی دەوحەی 2025 لەژێر دروشمی "چەسپاندنی دادپەروەری لە بەڵێنەکانەوە بۆ واقیعی بەرجەستە" ئەمڕۆ دەستیپێکرد و دوو ڕۆژ دەخایەنێت، بە سپۆنسەری شێخ محەممەد بن عەبدولڕەحمان ئال سانی، سەرۆکوەزیران و وەزیری دەرەوەی قەتەرە و شەش هەزار کەسایەتی لە 150 وڵاتەوە ئامادە دەبن.