بەریتانیا هەڕەشەی زیاتر لە حووسییەکان دەکات

ئاڤا دیجیتاڵ

 

هێرشی بەریتانیا بۆ سەر حووسییەکان بەرەوامە و سەرۆكوەزیرانی بەریتانیاش دەڵێت، لە هێرشەکانمان بەردەوام دەبین و رێگە نادەین رێڕەوە ئابوورییەكانی وڵاتەكە تووشی گرفت بن.

 

چیرۆكە سەرەكییەكە: هێرشی حووسییەکان بۆ سەر كەشتییە بازرگانی و ئابوورییەكان لە دەریای سوور، نیگەرانی گەورەی لە لای حكومەتی بەریتانیا دروستكردووە. ئەمڕۆ ڕیشی سووناك، سەرۆكوەزیرانی بەریتانیا لە پەرلەمانی وڵاتەکەی گوتارێكی پێشكەشكرد و گوتی: "رێگە نادەین دەریای سوور تووشی گرفتی گەورە ببێت".

 

لێدوانی فەرمی: ڕیشی سوناك، لە بەردەم ئەندامانی پەرلەمان گوتی: "وڵاتەكەم ئامانجی ڕووبه‌ڕووبوونه‌وەی لەگەڵ حووسییەكان نییە‌، بەڵام زۆر بەتوندی وەڵامی ئەو گرووپانە دەدەینەوە كە هێرشدەكەنە سەر كەشتییەكانمان". سەرۆکوەزیرانی بەریتانیا هۆشداریشدا هەر هێرشێكی دیكە بكرێتە سەریان، وەڵامی توندیان دەدەنەوە.

 

ئەوەی پێویستە بیزانیت: حووسیەكان دەڵێن: "تاوەکو ئیسرائیل  لە هێرش و بۆردوومانەكانیان بۆ سەر غەززە بەردەوام بێت، ئەوانیش لە هێرشكردنە سەر ئەو كەشتییانەی لە دەریای سوور هاتووچۆ دەکەن، بەردەوام دەبن". حووسییەکان پێیانوایە، ئەو کەشتییانەی بەنێو دەریای سووردا هاتووچۆ دەکەن لە قازانجی ئەمریکا، بەریتانیا و ئیسرائیل کار دەکەن.

 

باکگراوند: لە سەرەتای مانگی یەكی ئەمساڵ، ئەمریكا و بەریتانیا بە هاوبەشی هێرشی مووشەكیان كردە سەر بنكە و بارەگای حووسییەكان لە یەمەن. تاوەکو ئێستا سێ جار بە چڕی بۆردوومانكراون و "زۆرترین شوێنیش كە زیانی بەركەوتووە كۆگای مووشەك، چەك و درۆنەكانی حووسییەکان بووە".