ڕێبوار تاڵەبانی: لە کەرکووک میوان بووەتە خاوەن ماڵ

ئاڤا نیوز

سەرۆکی پێشووی ئەنجوومەنی پارێزگای کەرکووک بە ئاڤای وت، حکومەتی فیدراڵی عێراق دەستوور و ڕێککەوتننامەکان پێشێل دەکات و بەعەقڵیەتی بەعس مامەڵە دەکات.

چیرۆکی سەرەکی: ئێوارەی ئەمڕۆ شەممە، لە سنووری کەرکووک بەبیانووی ئەوەی چوار پارچە زەوی کێشەیان لەسەرە و تاپۆکانیان بەناوی کەسێکی دیکەوەیە، لە گوندی گورزەیی شارەدێی پردێ، سوپای عێراق هاتە سەر زەوی جووتیارە کوردەکان و ڕێگری کرد لەوەی دروێنەی بەروبوومی گەنمە شامییەکانییان بکەن.

لێدوانی فەرمی: ڕێبوار تاڵەبانی، سەرۆکی  پێشووی ئەنجوومەنی پارێزگای کەرکوک بە ئاڤای ڕاگەیاند: هێنانی سوپا و داگیرکردنی زەوی جووتیارانی کورد لە کەرکووک، دەرهاویشتەی جێبەجێنەکردنی دەستوورە، ئەمەی ڕوودەدات نادەستوریی و نایاساییە و پێشێلکردنی ماددەی نۆی دەستوورە، حکومەتی عێراق بە عەقڵیەتی ڕژێمی بەعس مامەڵە دەکات.

ئاماژەی بەوەشکرد، "یەکڕیزنەبوونی کورد ئەوەندەی دیکە دۆخەکەی قووڵتر کردووەتەوە و لە کەرکووک میوان بووەتە خاوەن ماڵ."

پەیوەست بەم بابەتەوە: هەشت مانگ بەسەر بڕیاری پەرلەمانی عێراق لەبارەی هەڵوەشاندنەوەی بڕیارەکانی ڕژێمی بەعس و گەڕانەوەی زەوی بۆ خاوەنە ڕەسەنەکانیان تێپەڕیوە، بەڵام تاوەکو ئێستا بەکردەیی جێبەجێ نەکراوە، ئەمەش وایکردووە گۆڕینی دیموگرافیای ناوچە کوردستانییەکان بەردەوامبێت و کێشەی زەوی و زاری جووتیارانی کوردیش بەچارەسەر نەکراوی بمێنێتەوە.