دەستەی گشتیی ناوچە کوردستانییەکان: کێشەی جووتیارانی گوندی گورزەیی دەگەیەنرێتە بەغدا

ئاڤا نیوز

 

لەبارەی کێشەی چەند جووتیارێکی گوندی گورزەییان لە پردێ، سەرۆکی دەستەی گشتیی ناوچە کوردستانییەکانی دەرەوەی ئیدارەی هەرێمی کوردستان دەڵێت: "کێشەکە سیاسییە، بۆیە بە سیاسی چارەسەر دەکرێت نەک یاسایی".

 

چیرۆکی سەرەکی: ئێوارەی شەممە 6-12-2025، لە گوندی گورزەیی ناحیەی پردێ، سوپای عێراق ڕێگریان لە جووتیارانی کورد کرد دروێنەی گەنمەشامی بکەن. بە بیانووی ئەوەی، زەوییەکان موڵکدارییەکەیان بۆ کەسێک دەگەڕێتەوە کە تاپۆکەی بەناوەوەیە، ئەمە لە کاتێکدایە جووتیارانی کوردی گوندەکەش خاوەنی ڕەسەنی ئەو زەویانەن و تاپۆیان هەیە.

 

لێدوانی فەرمی: فەهمی بورهان، سەرۆکی دەستەی گشتیی ناوچە کوردستانییەکانی دەرەوەی ئیدارەی هەرێمی کوردستان بە ئاڤا میدیای ڕاگەیاند: وەکو قەرەبوو لە سەردەمی بەعس هەزار و 400 دۆنم زەوی بەناوی کەسێکی عەرەب کراوە، کە خەڵکی نەینەوایە، ئەم کەسە لە بەعس نزیکبووە، بۆیە ئەم بابەتە زیاتر سیاسییە وەک لە یاسایی.

 

فەهمی بورهان ئەمانەشی وت:

- ئەوەی لە پردێ ڕووی دا ڕووداوێکی نوێیە و دوای کێشەی جووتیارانی سەرگەڕان سەریهەڵداوە، ئێستا ئێمە بۆ ئەم بابەتە لەسەر هێڵین، ڕۆژی سێشەممە لە هەولێر لەگەڵ جووتیارەکان کۆدەبینەوە، دواتر داواکارییان بۆ ئەنجوومەنی وەزیران بەرزدەکەینەوە، تاوەکو ئاراستەی بەغدا بکرێت.

 

- ئەم بابەتە زیاتر لە ڕێی سیاسییەوە چارەسەر دەکرێت وەک لە یاسا، ئێستا پرسی پێکهێنانی حکومەتی عێراق لە ئارادایە، بۆیە دەکرێت لە کاتی گفتوگۆکان ئەمەش بخرێتە بەرباس.

 

زانیاریی زیاتر: بڕیارە ئەمڕۆ یەکشەممە، جووتیارانی کورد لە پردێ لەگەڵ فەرماندەی ئۆپەراسیۆنەکانی کەرکووک لەسەر کێشەکەی شەوی ڕابردوو کۆببنەوە.