هاوپەیمانیی نەسر: ئەم هەفتەیە کاندیدی پۆستی سەرۆکوەزیران یەکلایی دەکرێتەوە

ئاڤا نیوز

 

وتەبێژی هاوپەیمانیی نەسر دەڵێت، لەم هەفتەیەدا کاندیدی پۆستی سەرۆکوەزیرانی عێراق و لە سەرەتای ساڵی نوێشدا هەر سێ سەرۆکایەتییەکەی عێراق یەکلایی دەکرێنەوە، جەختیش دەکاتەوە لەوەی لە هەڵبژاردنی کاندیدی سەرۆکوەزیراندا لایەنی ناوخۆیی و هەرێمی ڕەچاو دەکرێت.

 

وێنە گەورەکە: چاوەڕێ دەکرێت لە دوو هەفتەی داهاتوودا سەرجەم ڕێکارەکانی پەیوەست بە هەڵبژاردن تەواو بکرێن و دادگای فیدراڵیش ناوی کاندیدە براوەکانی خولی شەشەمی پەرلەمانی عێراق پەسەند بکات، لە هەنگاوی دواتریشدا سەرۆکی پەرلەمان لە پشکی سووننەکان و سەرۆککۆمار لە پشکی کورد هەڵدەبژێردرێت، دواتریش سەرۆککۆمار کاندیدی گەورەترین فراکسیۆنی پەرلەمان بۆ پێکهێنانی حکومەت ڕادەسپێرێت.

 

لێدوانی فەرمی: سەلام زوبەیدی، وتەبێژی هاوپەیمانیی نەسر کە بەشێکە لە چوارچێوەی هەماهەنگیی شیعەکان، ئەمڕۆ یەکشەممە بە ڕۆژنامەی سەباحی ڕاگەیاند، چوارچێوەی هەماهەنگی ئەم هەفتەی دیاری کردووە بۆ هەڵبژاردنی کەسێک و کاندیدکردنی بۆ پۆستی سەرۆکوەزیرانی عێراق، لە هەڵبژاردنی ئەو کەسەشدا لایەنی ناوخۆیی و هەرێمیی و کەسایەتی سیاسی و ڕوانگەی ئابوورییەکەی ڕەچاو دەکرێت و دەبێتە نوێنەری عێراق.

 

وتیشی، چوارچێوەی هەماهەنگی بۆ یەکلاییکردنەوەی پۆستی سەرۆکوەزیران پابەندە بە وادە دەستوورییەکان، ئاماژەکانیش بۆ ئەوە دەچن سەرەتای ساڵی داهاتوو یەکلایی کردنەوەی سەرۆکایەتییەکان تەواو بکرێت.