فیلمێکی کوردی خەڵاتێکی نێودەوڵەتیی دەباتەوە

ئاڤا نیوز

فیلمی دۆکیومێنتاری "سەفورا" لە دەرهێنانی هونەرمەندی ناوچەی هەورامان لە ڕۆژهەڵاتی کوردستان، پەروێز ڕۆستەمی، بەشداریی فێستیڤاڵی نێودەوڵەتیی "سێباستا "ی لە ئیتاڵیا کرد و توانی پلەی دووەم بەدەست بهێنێت.

لێدوانی فەرمی: پەروێز ڕۆستەمی، دەرهێنەری فیلمی سەفورا، بە ئاڤا میدیای گوت: سەفورا لە وڵاتی سربیاشدا خەڵاتی باشترین فیلمی لە بواری مرۆڤناسیدا بردووەتەوە و لە فێستیڤاڵێک لە وڵاتی "چیک"یشدا دوو خەڵاتی بردووەتەوە لە بوارەکانی وێنەگری و باشترین فیلمدا. 

زانیاریی زیاتر: فیلمی سەفورا باس لە ژیانی ژنێک دەکات لە گوندی "ناو" لە ناوچەی هەورامانی ڕۆژهەڵاتی کوردستان. ئەو ژنە پێش ئایینیی ئیسلام ژیاوە و گەورەترین کەسایەتیی گوندەکەیان بووە و دوای مەرگی هەموو ساڵێک بۆنەیەکی بۆ بەڕێوەدەچێت.

- بۆنەکە لە وەرزی بەهار دایە و تەنیا ژنان بەشداریی تێدا دەکەن، ژنان دەف لێدەدەن و دەپاڕێنەوە باران ببارێت. هەروەها لە هەموو بەروبوومە خۆماڵییەکانی گوندەکە خواردنێک دروست دەکەن و دواتر دابەشی دەکەن.

ئەمەش بزانە: پەروێز ڕوستەمی نزیکەی 80 خەڵاتی نێوەدەوڵەتیی بردووەتەوە، ئەمە جگە لەو خەڵاتانەی لە ئێراندا وەریگرتووە، ئەو دەڵێت: "شوناسی ئێمە لە کولتوور و شوناسمانەوە سەرچاوە دەگرێت، بەڵام بەداخەوە لە جیهانی مۆدێرندا ئەم شتانە خەریکن کاڵ دەبنەوە و نامێنن"