دەستەی دادوەریی هەڵبژاردن هەموو تانەکانی هەڵبژاردنی یەکلاییکردەوە

ئاڤا نیوز

دەستەی دادوەریی هەڵبژاردنی سەر بە کۆمیسیۆنی هەڵبژاردن ڕایگەیاند، هەموو تانەکانی لایەن و کاندیدەکان دژی ئەنجامەکانی هەڵبژاردن یەکلاکراونەتەوە.

ئەوەی پێویستە بیزانیت: دوای یەکلاکردنەوەی تانەکان، چاوەڕێ دەکرێت لە دوو هەفتەی داهاتوودا سەرجەم ڕێکارەکانی پەیوەست بە هەڵبژاردن تەواو بکرێن و دادگای فیدراڵیش ناوی کاندیدە براوەکانی خولی شەشەمی پەرلەمانی عێراق پەسەند بکات، ئینجا دوای ئەوە هەنگاوە کردارییەکان بۆ دانیشتنی پەرلەمان دەستپێدەکات.

ڕاگەیێنراوی فەرمی: دەستەی دادوەریی هەڵبژاردن لە ڕاگەیێنراوێکدا ئاشکرای کرد، ئەمڕۆ یەکشەممە، پێداچوونەوەی خۆی بە سەرجەم تانەکان کە 853 تانەن کە لە دژی ئەنجامی هەڵبژاردنەکان پێشکەش کراون کۆتاییپێهێنا.

لەلایەکی دیکەوە: پێشتر، عیماد جەمیل، ئەندامی تیمی ڕاگەیاندن لە کۆمیسیۆنی هەڵبژاردنەکان ڕایگەیاندبوو، ڕۆژی یەکشەممە تەواوی تانەکان یەکلایی دەکاتەوە، ئەو تانانەشی ماون کاریگەرییان لەسەر ئەنجامەکانی هەڵبژاردن نابێت.