مەزڵووم عەبدی: دوای کەمکردنەوەی هاوکارییەکانی ئەمریکا بارمان قورس بووە لەبەڕێوەبردنی کەمپی هۆل

ئاڤا نیوز

فەرماندەی هێزەکانی هەسەدە ئاشکرای دەکات، دوای ئەوەی ئەمریکا هاوکارییەکانی بۆیان کەمکردووەتەوە، هێزی مرۆیی و پاڵپشتی مرۆیی زۆر کەمتریان هەیە بۆ بەڕێوەبردنی کەمپی هۆل کە هەزاران خێزان و منداڵانی چەکدارانی ڕێکخراوی "داعش"ـی تێدایە، هاوکات سوپاسی پاڵپشتی و هاوکارییەکانی  هەرێمی کوردستانی کرد.

وێنە گەورەکە: کەمپی هۆل، گەورەترین کەمپی ژن و منداڵی خێزانەکانی داعشە لە ڕۆژئاوای کوردستان، بەگوێرەی نوێترین ئاماری ئیدارەی ڕۆژئاوای کوردستان، ئێستا زیاتر لە 30 هەزار کەسی تێدا ماوە.

لێدوانی فەرمی: مەزڵووم عەبدی، فەرماندەی هێزەکانی هەسەدە ڕایگەیاند: هاوکارییەکان کەمبوونەتەوە، ژمارەی کارمەندانی ئەمنیش کەمبووەتەوە، ئەمەش وایکردووە لە بودجەکەمان کەمبکەینەوە بۆ پاراستنی ئاسایشی کەمپ و زیندانەکان. ڕوونیشیکردەوە، “ئێمە لێرە ڕێکخراوە ناحکومییەکانمان کەمتر هەیە بۆ پاڵپشتیکردنی ئەرکەکە، لە بودجەی خودی هەسەدەوە، دەبێت هێز دابین بکەین و کەمپەکە بپارێزین سەرەڕای ئەو سەرچاوە سنووردارانەی لەبەردەستدایە بۆ بەرگریکردن لە خۆمان".

گۆشەیەکی دیکەی دیمەنەکە: مەزڵووم عەبدی سوپاس و پێزانینی خۆی بۆ نێچیرڤان بارزانی، سەرۆکی هەرێمی کوردستان دەربڕی و وتی: "هێزەکانی سووریای دیموکرات زۆر سوپاسگوزارن بۆ ئەو پاڵپشتییەی نێچیرڤان بارزانی پێشکەشی کردووە، ئێمەش زۆر سوپاسگوزارین، بەڵام بوار بۆ هەوڵی زیاتر لەمبارەیەوە هەیە".

ژمارەکان وا دەڵێن: بە وتەی عەبدی، زیاتر لە 26 ناوەندی دەستبەسەرکردن و سێ زیندانی سەرەکی هەیە کە تا 10 هەزار زیندانی پیاوی داعشی تێدایە، زیندانە سەرەکییەکانیش لە شاری حەسەکەن، هەریەکەیان 3 هەزار یان 4 هەزار زیندانییان تێدایە، جگە لە زیندانەکانی دیکەی ڕەققە هەزار و 500 زیندانییان تێدایە، لە قامیشلۆش هەزار زیندانییان تێدایە. ئەمانە شەڕکەری لە ڕادەبەدەر مەترسیدارن".