قوباد تاڵەبانی بەسەرۆکایەتی شاندێکی یەکێتی دەچێتە بەغدا

ئاڤا نیوز

ئێوارەی ئەمڕۆ، قوباد تاڵەبانی، بە سەرۆكایەتی وەفدێكی باڵای یەكێتیی نیشتمانیی كوردستان دەگاتە بەغدا و لەگەڵ سەركردەی لایەنە سیاسییەكانی عێراق، چەند كۆبوونەوەیەك ئەنجام دەدەن.

ڕاگەیێنراوی فەرمی: ئامانجی سەردانەکەی قوباد تاڵەبانی، گفتوگۆکردن دەبێت لەگەڵ سەرکردەی لایەنە سیاسییە عێراقییەکان تایبەت بە پێکهێنانی حکومەتی داهاتووی عێراق.

پەیوەست بەم بابەتە: لە دانیشتنی لەگەڵ دانێل كرێبەر، باڵیۆزی ئەڵمانیا لە عێراق، قوباد تاڵەبانی، ئەندامی مەكتەبی سیاسیی یەكێتی ئاماژەی بەوە كرد، عێراق پێویستی بە حکومەتێکی بەهێز و کارا هەیە، کە بتوانێت سەروەری و سەربەخۆیی عێراق بپارێزێت، هاوكات هەنگاوی بنەڕەتی بنێت بۆ گەشەپێدانی ئابووری، لەو چوارچێوەیەشدا، چارەسەركردنی بنەڕەتیی كێشەكانی نێوان هەرێمی كوردستان و عێراق، ئەولەویەتی ئەو حكومەتە نوێیە بێت.

ئەوەی پێویستە بیزانیت: یەكێتی لە دوایین هەڵبژاردنی ئەنجوومەنی نوێنەرانی عێراق، 18 كورسیی پەرلەمانی بردووەتەوە و لەسەر ئاستی سەرجەم حیزب و هاوپەیمانییەتیەكان لە ڕیزبەندی شەشەم دێت.

لەلایەکی دیکەوە: بەپێی زانیارییەکانی ئاڤا، لە چەند ڕۆژی داهاتوودا پارتیش بە جیا شاندێک ڕەوانەی بەغدا دەکات بۆ گفتوگۆکردن لەگەڵ لایەنە سیاسییە عێراقییەکان لەبارەی حکومەتی داهاتووی عێراق.