ئیدارەی خۆسەر: حکومەتی کاتی سووریا گەلانی سووریای بێهیوا کردووە

ئاڤا نیوز

لە یەکەمین ساڵوەگەڕی ڕووخانی ڕژێمی بەشار ئەسەد، ئیدارەی خۆسەر لە باکوور و خۆرهەڵاتی سووریا ڕاگەیێنراوێکی بڵاو کردەوە و ئاماژە بەوە دەدات حکوومەتی کاتی سووریا کە ساڵێکە دەسەڵاتی بە دەستەوەیە، گەلانی سووریای بێ هیوا کردووە.

وێنە گەورەکە: سبەی ساڵێک بەسەر کەوتنی ڕژێمی بەشار ئەسەد لەلایەن دەستەی تەحریری شام تێدەپەڕێت و بەم جۆرەیش کۆتایی بە شەڕی ناوخۆیی لە سووریا هات کە 12 ساڵ بوو و ئەو وڵاتەی دووچاری کاولکاری کردبوو.

ڕاگەیێنراوی فەرمی: ئیدارەی خۆسەر لە ڕاگەیێنراوێکدا بیری خستووەتەوە لەسەردەمی حوکمڕانی ڕژێمی بەعسی سووریا ئەو نیشتمانپەروەرانە سەرکوت دەکران کە هەوڵی بونیاندنانەوەی سووریایان دەدا لەسەر بنەمای دیموکراسی و گۆڕانکاری و لەخۆگرتنی هەمووان. بە تووندترین شێوە وەڵامی داواکارییە ڕەواکانی گەلی سووریای دەدایەوە. ئاماژەی بەوەش داوە خستنە زیندانی خەڵک بەشێوەی هەڕەمەکی و شوێنبزرکردنی خەڵک، نەژادپەرستی و مەزهەبگەرایی لە ماوەی حوکمڕانی ڕژێم رۆڵی بەرچاوی هەبووە لە دابەشبوونی کۆمەڵگا و تاڵانکاری لە سووریا.

ئیدارەی خۆسەر پیرۆزبایی ساڵوەگەڕی ڕووخانی ڕژێم لە کەسوکاری شەهیدان، تەواوی خەڵکی سووریا و مەزهەبە جیاوازەکان دەکات و دەڵێت: ڕووخانی ڕژێمی بەعس خەونی لەمێژینەی سوورییەکان بوو. لەگەڵ هاتنەدی ئەو خەونەدا، ئەمڕۆ وەک هێمای سەرکەوتنی ئیرادەی گەل و وەک گوزارشتکردن لە هیوا بۆ داهاتوویەکی دادپەروەرانە خەڵک بە شێوەیەکی بەرفراوان ئەم یادە بەرز ڕادەگرێت.

لە ڕاگەیێنراوەکەدا ئەمانەش هاتوون:

٠ بوونیادنانی سووریایەکی ناناوەندی، ئازاد و دیموکرات کە تێیدا گەلان بپارێزرێن، ڕێز لە جیاوازییەکان بگیرێت، گوشارەکان نەهێڵرێن، کۆتایی بە نادادی و هەژاری بهێنرێت پێویستی بە هەوڵی جددییە. ئەم قۆناغە مێژووییە هەستیارترین و مەترسیدارترین قۆناغە لەسەر ڕێگای سووریای نوێ و پێویستی بە هۆشیاری نیشتمانی و دیدگایەکی هاوبەش و کاری هاوبەشی هەموومانە.

٠ هەر لە دیالۆگی نیشتمانی، تا پێکهێنانی حکوومەت و دوایین هەڵبژاردنی پەرلەمان، نوێنەرانەتی تەواوی چین و توێژەکانی سووریا ناکرێت. لەوەش زیاتر ئەو کۆمەڵکوژییانەی لە ناوچە کەناراوەییەکان و سوەیدا ئەنجام دراون، بنەماکانی یەکڕیزیی نیشتمانییان پێشێل کردووە و بەشێوەیەکی مەترسیدار ڕێگەی لەبەردەم دابەشبوونی کۆمەڵگا کردووەتەوە و هاوکات بووەتە هۆی زیادبوونی ڕقوکینە، کاری تێکدەرانە و پەڕگیرانە.

٠ ئیدارەی خۆسەر حکوومەتی کاتی سووریا بەوە تۆمەتبار دەکات لە پەراوێزخستن، دووربوون لە شەفافیەت، بڕیاردانی تاکلایەنە و نادیدەگرتنی ئیرادەی گەل عەقڵییەتی زۆر نزیکە لە هیی ڕژێمی پێشوو.

٠ داوا دەکەین حکوومەتی کاتی سیاسەتێکی نیشتمانی پیادە بکات کە تەواوی خەڵکی سووریا لەخۆ بگرێت و دڵنیایی بدات لەوە. ئەمە دەبێتە هۆی ئەوەی دیالۆگێکی نیشتمانیی جیدی و بەرفراوان لەنێوان سەرجەم نوێنەرانی گەلی سووریا دەست پێ بکات و ئەو هاووڵاتییانە بگەڕێنەوە زێدی خۆیان کە ئاوارە و دەربەدەر بوون، یان پەنایان بردووەتە بەر وڵاتان و کار بەو میکانیزمە خێرایانەش بکرێت کە ئامانجەکانی گەلی سووریا دەهێننە دی.