کرێملن: ستراتیژییە نوێیەکەی ترەمپ لەگەڵ دیدگای ئێمەدا یەکدەگرێتەوە

ئاڤا نیوز

ڕووسیا پێشوازی لە ستراتیژی نوێی ئاسایشی نیشتمانی ئەمریکا کرد کە لەلایەن دۆناڵد ترەمپەوە داڕێژراوە و ناوەڕۆکەکەی بە هەنگاوێکی ئەرێنی وەسف دەکات، ئەمەش لە کاتێکدایە بەشێک لە بەرپرسانی ئەوروپا ناوەڕۆکی بەڵگەنامەکە بە مەترسیدار دەزانن.

چیرۆکی سەرەکی: ستراتیژی نوێی ئەمریکا لە 33 لاپەڕە پێکهاتووە و هەفتەی ڕابردوو لەلایەن ئیدارەی ترەمپەوە بڵاوکرایەوە، دیدگایەکی جیاواز بۆ جیهان و ئەوروپا دەخاتەڕوو، سەبارەت بە ئەوروپا  هۆشداری دەدات کە ئەوروپا ڕووبەڕووی سڕینەوەی شارستانی بووەتەوە و پێشبینی دەکات لە ماوەی 20 ساڵ یان کەمتردا کیشوەرەکە  نەناسرێتەوە.

لە ستراتیژەکەدا، بە پێچەوانەی ڕابردوو، ئەمریکا ڕووسیا وەک هەڕەشەیەک بۆ سەر خۆی وێنا ناکات و زمانێکی نەرمتری بەکارهێناوە. ئیدارەی ترەمپ یەکێتیی ئەوروپا تۆمەتبار دەکات بەوەی ڕێگرە لە هەوڵەکانی ئەمریکا بۆ کۆتاییهێنان بە جەنگ.

لێدوانی فەرمی: دیمیتری پێسکۆڤ، وتەبێژی کۆشکی کرێملن، لە چاوپێکەوتنێکدا لەگەڵ ئاژانسی هەواڵی تاسی ڕووسی ڕایگەیاند، ئەو گۆڕانکارییانەی لە ستراتیژییە نوێیەکەی ئەمریکادا دەیبینین، تا ڕادەیەکی زۆر لەگەڵ دیدگای ئێمەدا یەکدەگرنەوە و وەک هەنگاوێکی ئەرێنی سەیری دەکەین.