بەرگریی شارستانیی هۆشداری لە بەکارهێنانی ڕێگاکانی دەرەوەی شار دەدات

ئاڤا نیوز

لەگەڵ هاتنی شەپۆلی باران بارین، بەرگریی شارستانی سەرجەم تیمەکانی خستووەتە باری ئامادەباشی و داواش دەکات بە وریاییەوە ڕێگاکانی دەرەوەی شارەکان بەکاربێنن، بەهۆی کەمبوونەوەی ماوەی بینین.

وێنە گەورەکە: ماوەی دوو ڕۆژە شەپۆلێکی بارانبارین ناوچەکانی هەرێمی کوردستانی گرتووەتەوە، بۆ ماوەی چەند ڕۆژێک بەردەوام دەبێت، پێشوەختە تیمەکانی شارەوانی ئامادەکارییان کردبوو بۆ ڕێگریکردن لە لافاو و بەرگریی شارستانیی تیمەکانی خستووەتە باری ئامادەباشی.

لێدوانی فەرمی: سەرکەوت کاڕەش، وتەبێژی بەرگریی شارستانیی هەرێمی کوردستان؛ بە ئاڤای گوت، تیمەکانی بەرگریی شارستانی لەسەرجەم پارێزگا و ئیدارە سەربەخۆکان خراونەتە باری ئامادەباشی بۆ هەر ئەگەرێکی نەخوازراو کە لە ئەنجامی ئەو شەپۆلە بارانبارینە دروست ببێت، هاوکات هەموو کەلوپەلێکی پێویست بۆ ڕزگارکردنی هاونیشتمانیان لە کاتی ڕووداوی نەخوازراو ئامادە کراون.

زانیاریی زیاتر: بەرگریی شارستانیی هەرێمی کوردستان، داوا لە هاونیشتمانیان دەکات کە خۆیان بەدوور بگرن لەو شوێنانەی ئاو تێیدا پەنگ دەخواتەوە، داواش لە شوفێران دەکات بە وریاییەوە مامەڵە لەگەڵ ڕێگاکانی دەرەوەی شار بکەن لە کاتی بارانبارین و تەم خێراییان کەم بکەنەوە، بۆ هەر بارێکی نەخوازراویش پەیوەندی بە هێڵە گەرمەکانی بەرگریی شارستانی بکەن.

لەلایەکی دیکەوە: ئومێد خۆشناو، پارێزگاری هەولێر ڕایگەیاند، ژمارەیەک پرۆژەی ستراتیژی وەک پۆند و بەنداو و ئاوەڕۆ دروست کراون، پلانێکی وەرزییش بۆ خاوێنکردنەوەی ڕێڕەوەکانی ئاوی باران و ئاوەڕۆکان جێبەجێ کراوە و مەترسییەکانی لافاو کەمکراونەتەوە، بە هەماهەنگی لایەنە پەیوەندیدارەکانیش پلانێکی تایبەت ئامادەکراوە بۆ ڕووبەڕووبوونەوەی هەر بارێکی لەناکاو.