ئەمریکا توانا ئەتۆمییەکانی نوێ دەکاتەوە

ئاڤا نیوز

پیت هێگسێت، وەزیری جەنگی ئەمریکا، ڕایگەیاند، ئەمریکا توانا ئەتۆمییەکانی نوێ دەکاتەوە و هەرگیزیش ڕێگە نادات بکەوێتە ژێر هەڕەشەی ئەتۆمیی وڵاتانی دیکەوە.

لێدوانی فەرمی: هێگسێت وتی سەرۆک ترەمپ جەختی لەسەر کردووەتەوە کە توانا ئەتۆمییەکەمان نوێ بکەینەوە هەروەها توانای بەرپەرچدانەوەشمان زیاتر دەکەین.

زانیاریی زیاتر: هێگسێت دووپاتی کردەوە کە ئەمریکا چەکی ئەتۆمی لە ئاستێکدا تاقیدەکەینەوە کە یەکسانە بە ئاستی وڵاتانی دیکە.

لەلایەکی دیکەوە: پشتر ماتیۆ ویتاکێر، نوێنەری هەمیشەیی ئەمریکا لە ناتۆ، ڕایگەیاندبوو ئەمریکا بەنیازی ئەوە نییە توانا ئەتۆمییەکانی 'فراوان' بکات، بەڵکو زیاتر کار لەسەر 'نوێکردنەوە'یان دەکات و ئەم نوێکارییەشی بە 'پێویست' ناوبرد.

کاردانەوەکان: لە بەرامبەر ئەم لێدوانانەدا، دیمیتری پێسکۆڤ، وتەبێژی کرێملین، جەختی لەوە کردەوە کە مۆسکۆ ڕێوشوێنی گونجاو دەگرێتەبەر ئەگەر واشنتن بە شێوەیەکی کاریگەر لە قەدەغەکردنی تاقیکردنەوە ئەتۆمییەکان پاشەکشە بکات. هاوکات، سێرگی لاڤرۆڤ، وەزیری دەرەوەی ڕوسیا ڕایگەیاند، ئەگەر هەر هێزێکی دیکەی ئەتۆمی تاقیکردنەوە ئەتۆمییەکان دەستپێبکاتەوە، ئەوا ڕووسیاش دەستدەکات بە ئەنجامدانی تاقیکردنەوە ئەتۆمییەکانی خۆی.