ئوسترالیا بە فەرمی بەکارهێنانی سۆشیاڵ میدیای لە منداڵانی خوار تەمەن 16 ساڵان قەدەغە کرد

ئاڤا نیوز

 

ئوسترالیا وەک یەکەم وڵات لە جیهاندا بڕیاری قەدەغەکردنی بەکارهێنانی تۆڕە کۆمەڵایەتییەکانی بۆ منداڵانی خوار تەمەن 16 ساڵ خستە بواری جێبەجێکردنەوە.

 

هۆکارە زانراوەکان: ئامانج لەم بڕیارە ڕێگریکردنە لە  منداڵان لە ئاڵوودەبوونی بەکارهێنانی تۆڕە کۆمەڵایەتییەکانی وەک فەیسبووک، ئینستاگرام و تیکتۆک بە بەردەوامی.

 

زانیاریی زیاتر: بەپێی یاسا نوێیەکە، هەر کۆمپانیایەکی گەورەی تەکنەلۆژی ئەگەر ڕێوشوێنی پێویست نەگرێتەبەر بۆ سڕینەوە و ڕێگریکردن لە بەکارهێنەرانی سۆشیاڵ میدیا لە منداڵانی خوار تەمەن 16 ساڵ، ڕووبەڕووی سزای دارایی دەبێتەوە کە دەگاتە 33 ملیۆن دۆلاری ئەمریکی. 

 

بڵاوکراوەی فەرمی: حکومەتی ئوسترالیا جەخت لەوە دەکاتەوە کە ئەم ڕێکارە توندانە پێویستن بۆ پاراستنی منداڵان لە لە بابەتە نەشیاوەکان کە شاشەی مۆبایلەکان پڕ دەکەن لە ناوەڕۆکی توندوتیژی، سێکسی و هەراسانکردنیان.

 

لێدوانی فەرمی: ئەنتۆنی ئەلبانیز، سەرۆکوەزیرانی ئوسترالیا پێش جێبەجێکردنی بڕیارەکە ڕایگەیاند، زۆرجار سۆشیاڵ میدیا بەهیچ شێوەیەک کۆمەڵایەتی نییە، بەڵکو بووەتە چەکێک بۆ ستەمکاران، سەکۆیەک بۆ فشاری دەروونی، هۆکارێک بۆ دڵەڕاوکێ، ئامرازێک بۆ فێڵبازان و لە هەمووی خراپتر، کەرەستەیەکە بۆ دەستدرێژیکاران.