بڕیار لەسەر پشووی فەرمی لە پارێزگا و ئیدارە سەربەخۆکان دەدرێت

ئاڤا نیوز

 

بەهۆی نالەباریی کەشوهەوا پشووی فەرمی لە ئیدارەی سەربەخۆی گەرمیان ڕاگەێنراوە، دەسەڵاتیش دراوە تا لە قەزا و ناحییەکانیش لە ئەگەری هەبوونی مەترسیی لافاو پشوو ڕابگەێنن.

 

وێنە گەورەکە: ماوەی 24 کاتژمێرە شەپۆلێکی تووندی بارانبارین ڕووی لە ناوچە جیاوازەکانی هەرێمی کوردستان کردووە، بەهۆیەوە ئاستی ئاو بەڕێژەیەکی بەرچاو بەرزبووەتەوە و لە قەزای چەمچەماڵیش لافاو دروستبووە و دوو کەس گیانیان لەدەستداوە و منداڵێکی دیکەش لە کەرکووک لافاو بردی و گیانی لەدەست دا، هاوکات دەیان ئۆتۆمبێل و خانوو کەوتوونەتە ژێر ئاو.

 

لێدوانە فەرمییەکان: پێشەوا هەورامانی، وتەبێژی حکومەتی هەرێمی کوردستان بە ئاڤای ڕاگەیاند: تاوەکو ئێستا بڕیارنەدراوە سبەی چوارشەممە بەهۆی نالەباریی کەشوهەواوە بکرێتە پشووی فەرمی. 

 

لەلایەکی دیکەوە: ئومێد خۆشناو، پارێزگاری هەولێر بە ئاڤای گوت، هیچ هۆکارێک بەپێویست نابینن تاوەکو سبەی یەکشەممە بکرێتە پشوو، هەموو لایەک ئاگادار دەکەینەوە بەیانی لە سەرجەم فەرمانگە و دامودەزگاکان دەوام ئاسایی دەبێت و پشوو نابێت.

- هەڤاڵ ئەبوبەکر، پارێزگاری سلێمانی: دەسەڵار دراوە بە سەرجەم قەزا و ناحییەکان ئەگەر مەترسی هەبوو دەتوانن پشوو ڕابگەیێنن.

- ڕەمەک ڕەمەزان، قایمقامی چەمچەماڵ: بەهۆی ئەو لافاو و کارەساتە سرووشتیەی ئەمرۆ ڕووی لە قەزاکەمان کرد، بەپێی ئەو دەسەڵاتەی پێماندراوە، سبەی لەسەرجەم دام و دەزگا حکومیەکان و قوتابخانە و خوێندنگەکان و زانکۆ و پەیمانگاکان پشووی فەرمیە، جگە لەو دام و دەزگایانەی ئێشکگری بەردەوامیان هەیە.

 - سمکۆ ساڵار، پارێزگاری هەڵەبجە بە وەکالەت: تا ئێستا بڕیارمان نەداوە سبەی پشوو بێت یان نا، بەڵام ئەگەر دۆخەکە بەرەو خراپ ڕۆیشت بڕیاری لەسەر پشوو دەدەین. 

- لە پارێزگای دهۆکیش هۆکارێک نییە بۆ ئەوەی پشوو ڕابگەێنرێت، سەرجەم تیمەکان لە ئامادەباشیدان بۆ هەر ئەگەرێکی نەخوازراو. 

 

لەلایەکی دیکەوە: ئیدارەی گەرمیان ئاگاداریی هاووڵاتییان دەکاتەوە، بەپێی پێشبینییەکانی کەشوهەوا ئەو شەپۆلە بارانبارینەی ڕووی لە ناوچەکە کردووە ڕوو لە زیادبوونە، بۆیە لەپێناو سەلامەتیی گشتی، هاتووچۆی نێوان شارەکان ڕادەگیرێت و پێویستە هاوڵاتیان لە ماڵەکانیان بمێننەوە و بۆ کاری زۆر پێویست نەبێت نەچنە دەرەوە.

 

ئەمەش بزانە: وەزارەتی پەروەردە و خوێندنی باڵا دەسەڵاتیان داوە بە سەرجەم زانکۆ و  پەروەردەکان بۆ سەلامەتیی قوتابیان، ئەگەر پێویست بوو دەتوانن پشوو ڕابگەیێنن.