مەسرور بارزانی لەبارەی لافاوەکەی چەمچەماڵ: هەر یارمەتییەک پێویست بێت پێشەکەش بە لێقەوماوانی دەکەین

ئاڤا نیوز

 

سەرۆکوەزیران مەسرور بارزانی لە پەیامێکدا لەبارەی لافاوەکەی چەمچەماڵ دەڵێت، وەزارەتە پەیوەندیدارەکان و ئیدارەی خۆجێییم ڕاسپاردووە کە بە هانای لێقەوماوانەوە بچن و هەر هاوکاری و یارمەتییەک پێویست بێت، پێشکەشیان بکەن.

 

وێنە گەورەکە: لە 24 کاتژمێری ڕابردوودا شەپۆلێکی بەهێزی بارانبارین هەرێمی کوردستانی گرتووەتەوە و لە چەند شوێنێک بووەتە هۆی دروستبوونی لافاو بەتایبەت لە چەمچەماڵ. هاوکات  کەشناسیی کوردستان هۆشداری ئەوە دەدات لە 24 کاتژمێری داهاتوودا لە گەرمیان و پارێزگای هەڵەبجە مەترسیی دروستبوونی لافاو هەیە.

 

ڕاگەیێنراوی فەرمی: سەرۆکوەزیران مەسرور بارزانی لەبارەی دروستبوونی لافاو  لە چەمچەماڵ پەیامێکی بڵاو کردەوە و ڕایگەیاند، بە داخەوە بە هۆی لافاوەوە، دوو هاووڵاتی لە شارەدێی شۆڕش سەر بە قەزای چەمچەماڵ گیانیان لە دەستداوە و زیانی ماددیش بەر ماڵی هاووڵاتییان و قوتابخانە و فەرمانگەکانی حکومەت کەوتووە.

-پرسە و سەرەخۆشیی قووڵی خۆم ئاراستەی کەسوکاری قوربانیان دەکەم و هاوبەشی خەمیانم ، هیوای چاکبوونەوەی خێراش بۆ برینداران دەخوازم.

-وەزارەتە پەیوەندیدارەکان و ئیدارەی خۆجێییم ڕاسپاردووە کە بە هانای لێقەوماوانەوە بچن و هەر هاوکاری و یارمەتییەک پێویست بێت، پێشکەشیان بکەن.

 

باکگراوند؛ بەهۆی ئەو شەپۆلە بارانبارینە بەهێزەی ئەمڕۆ کە بووە هۆی دروست بوونی لافاو،  دوو کەس لە چەمچەماڵ و کەسێکی دیکەش لە ناحیەی گەیلان لە کەرکووک گیانیانی لەدەستدا. جگە لە زیانی گیانی هاوکات، زیانێکی زۆر بە ئۆتۆمبێل و خانووی هاونیشتمانیان لە ناوچە جیاجیاکانی کوردستان کەوت.