قایمقامی چەمچەماڵ: زیاتر لە 500 ماڵ بەهۆی لافاوەکە زیانیان بەرکەوتووە

ئاڤا نیوز

 
قایمقامی چەمچەماڵ دەڵێت، بەهۆی ئەو لافاوەی لە چەمچەماڵ دروستبوو، دوو کەس گیانیان لەدەست دا و 12 کەسیش برینداربوون، زیانێکی زۆری ماددیشی لێکەوتەوە.

 

وێنە گەورەکە: ئەمڕۆ سێشەممە 9-12-2025، بەهۆی ئەو شەپۆلە پێشبینیکراوەی بارانبارین کە ڕووی لە شاروشاروچکەکانی هەرێمی کوردستان کردووە، لافاو لە قەزای چەمچەماڵ دروستبوو و زیانی گیانی و ماددی لێکەوتەوە.

 

لێدوانی فەرمی: ڕەمک ڕەمەزان، قایمقامی چەمچەماڵ لە کۆنگرەیەکی ڕۆژنامەوانیدا ڕایگەیاند: لە مێژووی چەمچەماڵ کارەساتی هاوشێوە ڕووینەداوە، بەهۆیەوە دوو کەس گیانیان لەدەستداوە، 12 کەسیش برینداربوونە و چارەسەریان بۆ کراوە و هەموویان دۆخیان جێگیرە، هیچ کەسێکیش بێسەروشوێن نەبووە.

 

- تەنها لە چەمچەماڵ زیاتر لە 500 ماڵ زیانیان بەرکەوتووە، جگە لەوەی زیان بە چەندین فەرمانگەی حکومی، بازاڕ و دووکان، ئۆتۆمبێل و کەلوپەل کەوتووە، ئەو هاونیشتمانییانەی شۆفڵ و ئامێریان هەبووە هاوکاریی تیمەکانی حکومەتیان کرد، ئەگەرنا قوربانییەکان زیاتر دەبوون و قەبارەی زیانەکانیش بەرزتر دەبوونەوە.

 

هەنگاوی داهاتوو: سبەی چوارشەممە 10-12-2025، هەڵمەتێکی پاککردنەوە بۆ هەموو ئەو شوێنانە دەستپێدەکرێت کە بەهۆی لافاو زیانیان بەرکەوتووە.