ڕێگای گەلی زەنتا – دینارتە پاککرایەوە

ئاڤا نیوز

شەوی ڕابردوو، بەهۆی هاتنەوە خوارەوەی بەرد، بۆ ماوەیەک ڕێگای گەلی زەنتا – دینارتە داخرا، هەر دوێنێ شەو بەردەکان لادران و ڕێگاکە پاککرایەوە.

وێنە گەورەکە: شەپۆلێکی بارانبارین سەرتاسەری هەرێمی کوردستانی گرتووەتەوە، لە هەندێ ناوچەی شاخاوی بەهۆی باران بارینەوە هەندێجار بەشێکی شاخی تەنیشتی ڕێگاکان دادەڕمێت و بەرد دێنە سەر شەقام و ئاستەنگی هاتووچۆ دروست دەکەن.

چی ڕوویدا: شەوی ڕابردوو هەندێ بەردی گەورە داڕمابوون و هاتبوونە سەر ڕێگای گەلی زەنتا – دینارتە، بەهۆیەوە ڕێگاکە داخرابوو، دوای ماوەیەکی کەم تیمەکانی بەڕێوەبەرایەتیی ڕێگاوبانی ئاکرێ بەردەکانیان لابرد و ڕێگاکەیان خاوێن کردەوە.

لێدوانی فەرمی: موحسین میرانی، بەڕێوەبەری ڕێگاوبانی ئاکرێ، بە ئاڤای گوت: بەهۆی بارانبارین، ئەگەری داڕمانی بەرد دروست دەبێت، بۆیە ئێمە جگە لە ئەرکی سەرەکیمان لە دروست کردن و چاککردنەوەی ڕێگاوبانەکان، ئەرکی بەرگریی شارستانیش جێبەجێ دەکەین، لەو جۆرە بارانەدا تیمەکانمان لە ئامادەباشیدا دەبن، لە هەرشوێنێک پێوست بکات تیمەکانمان دەستبەجێ دەگەنە شوێنێ مەبەست و بۆ پاراستنی گیان و ماڵی هاونیشتمانیان لە ئەرکدا دەبن.