هاوکارییە مرۆییەکانی دەزگای خێرخوازیی بارزانی گەیشتە ناوچە زیانلێکەوتووەکان

ئاڤا نیوز

هاوکارییە مرۆییەکانی دەزگای خێرخوازیی بارزانی گەیشتە ناوچە زیانلێکەوتووەکانی لافاوەکەی دوێنێ، سەرۆکی دەزگاکە دووپاتی دەکاتەوە، تا ئەو کاتەی پێویست بێت ناردنی هاوکاری مرۆیی بۆ ئەو ناوچانە بەردەوام دەبێت.

وێنە گەورەکە: دەزگای خێرخوازیی بارزانی، دامەزراوەیەکی ناحکومی خێرخوازییە، لە کارەساتە سروشتی و ڕووداوە نەخوازراوەکان ئامادەیی هەیە و یارمەتی لێقەوماوان دەدات و هاوکاری مرۆیی دەگەیەنێتە ناوچە خەڵک و ناوچە زیانلێکەوتووەکان.

لێدوانی فەرمی: موسا ئەحمەد، سەرۆکی دەزگای خێرخوازیی بارزانی، لە کۆنگرەیەکی ڕۆژنامەوانیدا، گوتی: دوای ڕاسپاردنمان لەلایەن سەرۆک بارزانییەوە هەر دوێنێ تیمەکانمان دەست بەکاربوون، یەکەم کاروانی هاوکاری مرۆیی کە 64 تۆنە ڕەوانەی چەمچەماڵ و ناوچە زیانلێکەوتووەکان کرا.

ئاماژەی بەوەشکرد، بە هەماهەنگی لەگەڵ فەرمانگە و یەکە ئیدارییەکان، ناردنی هاوکاری مرۆیی بۆ خەڵک و ناوچە زیانلێکەوتووەکان بەردەوام دەبێت. ئەو هاوکارییانەی نێردراون جلوبەرگ و دۆشەک و بەتانی و ئاوی خواردنەوەیە.

کار لەسەر ئەوە دەکەین لە چەمچەماڵ و ڕزگاری و کەلار و هەر ناوچەیەک پێویست بێت خواردنی گەرم ئامادە بکەین. قۆناغی دواتر پاکێجی خۆراک و پێداویستی ناوماڵ بەسەر زیانلێکەوتووان دابەش دەکەین.