هەسەدە بۆ دیمەشق: یەکگرتن بەهێز ناسەپێنرێت

ئاڤا نیوز

هەسەدە لەبارەی ڕێککەوتنی تێکەڵبوونەوەی لەگەڵ سوپای سووریا وەڵامی دیمەشقی دایەوە و دەڵێت، یەکگرتن و تێکەڵبوونەوە بەهێز ناسەپێنرێت، بەڵکو بە لێکتێگەیشتن، هاوبەشی و نووسینەوەی دەستوورێکی دادپەروەر دێتەدی کە شکۆی سەرجەم ڕۆڵەکانی بپارێزێت.

چیرۆکی سەرەکی: ئەحمەد مۆفەق زێدان، ڕاوێژکاری سەرۆککۆماری سووریا دەڵێت، ئەو شاندانەی هەسەدە ڕەوانەی دیمەشقیان دەکات دەسەڵاتی جێبەجێکردنیان نییە و ئەو هێزە کات دەکوژێت، بۆیەش ئەمریکا و تورکیا لە جێبەجێنەکردنی ڕێککەوتنەکەی 10ـی ئازاردا، هەسەدە بە بەرپرسیار دەزانن.

لێدوانی فەرمی: ئەبو عومەر ئیدلبی، فەرماندەی لیوای باکووری دیموکراتی سەر بە هەسەدە ئەمڕۆ لە پەیامێکدا وتی، ئێستا سووریا دوو بژاردە زیاتری لەبەردەست نییە، ئەوانیش بریتین لە گەڕانەوە بۆ ناوەندێتی و تاکڕەوی بە بڕیارەوە بەناوی یەکڕیزییەوە، یانیش گرێبەستێکی نوێ بۆ دامەزراندنی دەوڵەتێکی یەکگرتوو، بەهێز بە هاوبەشی ڕۆڵەکانی و دانانی بەرژەوەندییەکانی سووریا لە پێش هەمووان نەک تەنیا بەرزکردنەوەی دروشم.

ئەوەشی خستەڕوو، پەیامیان بۆ حکومەتی کاتی سووریا ئەوەیە یەکگرتن بە پەراوێزخستن، بە بەکارهێنانی هێز و سەپاندنی ئەمری واقع نایەتەدی، بەڵکو بە لێکتێگەیشتن، هاوبەشی و نووسینەوەی دەستوورێکی دادپەروەر دێتەدی کە شکۆی سەرجەم ڕۆڵەکانی بپارێزێت.

ئەبو عومەر ئیدلبی دەشڵێت، یەکگرتنی ڕاستەقینە بە نەهێشتنی جیاوازییەکان نایەتەدی، بەڵکو بە ڕێکخستنی جیاوازییەکان لە چوارچێوەی نیشتماندا دێتەدی، جیاوازییەکانیش بەهێزی دەوڵەتی تازەن نەک لاوازی.