شیعەکان وادەی دیاریکردنی کاندیدی سەرۆکوەزیران ڕادەگەیێنن؛ نۆ کاندید مەرجەکانیان تێدایە

ئاڤا نیوز

ئەندامێکی چوارچێوەی هەماهەنگی دەڵێت، نۆ کاندید مەرجەکانی لیژنەی چوارچێوەی هەماهەنگی تایبەت بە دیاریکردنی سەرۆکوەزیرانیان تێدایە و دوای پەسەندکردنی ئەنجامی هەڵبژاردنیش لەلایەن دادگای فیدراڵییەوە، کاندیدی سەرۆکوەزیران یەکلایی دەکرێتەوە و ڕادەگەیێنرێت.

ئەوەی پێشبینی دەکرێت: چاوەڕێ دەکرێت تا کۆتایی ئەم مانگە سەرجەم ڕێکارەکانی پەیوەست بە هەڵبژاردن تەواو بکرێن و دادگای فیدراڵیش ناوی کاندیدە براوەکانی خولی شەشەمی پەرلەمانی عێراق پەسەند بکات، لە هەنگاوی دواتریشدا سەرۆکی پەرلەمان لە پشکی سووننەکان و سەرۆککۆمار لە پشکی کورد هەڵدەبژێردرێت، دواتریش سەرۆککۆمار کاندیدی گەورەترین فراکسیۆنی پەرلەمان بۆ پێکهێنانی حکومەت ڕادەسپێرێت.

لێدوانی فەرمی: فەهد جبووری، ئەندامی ڕەوتی حیکمە کە یەکێکە لە لایەنەکانی ناو چوارچێوەی هەماهەنگی ڕایگەیاند، کاندیدی سەرۆکوەزیران بەگوێرەی ئەو پێوەرانە دیاری دەکرێت کە پێشوەخت دانراون و نۆ کەس مەرجەکانیان تێدایە، دوای پەسەندکردنی ئەنجامەکانی هەڵبژاردنیش لەلایەن دادگای فیدراڵییەوە، چوارچێوەی هەماهەنگی کۆبوونەوەی یەکلاییکەرەوە بۆ دیاریکردنی کاندیدی سەرۆکوەزیران دەکات.

ئاماژەی بەوەشدا، بڕیار لەناو چوارچێوەی هەماهەنگی بە ڕێککەوتن دەدرێت و هەر بڕیارێکیش بدرێت هەمووان پابەندی دەبن.