لە زاخۆ کەسێک سێ بزنە کێوی دەکوژێت و دەستگیر دەکرێت

ئاڤا نیوز

 

کەسێک لە سنووری قەزای باتیفا لە سنووری ئیدارەی زاخۆ، سێ بزنی کێوی کوشتووە، دواتر هەوڵیداوە لەناو سندووقی هەنگ گۆشتەکەیان بگوازێتەوە، بەڵام فێڵەکەی ئاشکرا کراوە و دەستگیر کراوە.

 

چیرۆکی سەرەکی: ڕۆژی سێشەممە، 9-12-2025، لە گوندی کەشانی نزیک حەفتەنین، کەسێک کە پیشەی شوانە، سێ بزنی کێوی کوشتووە، دواتر گۆشتی بزنە کێوییەکانی پارچە پارچە کردووە و لەناو سندووقی هەنگی داناوە، ویستوویەتی بەمجۆرە خۆی لە بازگەکان دەرباز بکات و گۆشتی بزنە کێوییەکان بگەیەنێتە ناو سەنتەری قەزای باتیفا، بەڵام فێڵەکەی ئاشکرا کراوە و لە بازگەی دێمکا دەستگیر کراوە.

 

زانیاریی بەدەستهاتوو: بەڕێوەبەرایەتیی پۆلیسی دارستان و ژینگەی هەرێمی کوردستان بڵاوی کردووەتەوە: ئەو کەسەی بزنە کێوییەکانی کوشتووە، دەستگیر کراوە و دەست بەسەر چەک و ئۆتۆمبێلەکەشیدا گیراوە و بەپێی ماددە 42 لە یاسای پاراستن و چاککردنی ژینگە، پەڕاوی لێکۆڵینەوە بۆ کراوەتەوە.

 

زانیاریی زیاتر: تۆمەتبارەکە ناوی (د، ح، ش) و پیشەی شوانە و خەڵکی سنوورەکەیە، لە هەمان کاتیش کەسێکی چالاکی ناسراوی پلاتفۆرمەکانی سۆشیال میدیایە، بەهۆیەوە بووەتە کەسێکی ناسراو لە ناوچەکەی خۆی.

 

ئەمەش بزانە: بەپێی یاسا هەر کەسێک بزنێکی کێوی بکوژێت، بە پێبژاردنی 10 ملیۆن دینار سزا دەدرێت.

 

لە لایەکی دیکەوە: د. سەنعان عەبدوڵڵا، گوتەبێژی دەستەی پاراستن و چاککردنی ژینگەی هەرێمی کوردستان، بە ئاڤا میدیای گوت: لە ڕێگەی هۆبەی یاسایی ژینگەی دهۆک لە پەیوەندی بەردەوام دەبین، بۆ ئەوەی ئەو کەسەی بزنە کێویەکانی کوشتووە، توندترین سزای یاسایی بدرێت.