کۆمپانیای DNOـی نەرویجی هەشت بیرە نەوتی نوێ لە کوردستان لێدەدات

ئاڤا نیوز

 

کۆمپانیای DNOـی نەرویجی ڕایگەیاند، هەفتەی داهاتوو لە کێڵگەی تاوکێ لە سنووری ئیدارەی سەربەخۆی زاخۆ دەست بە پرۆسەی هەڵکۆڵینی هەشت بیرە نەوتی نوێ دەکەن و بە تەواوبوونیان، ئاستی بەرهەمهێنانی نەوت تیایدا بەڕێژەی 25% زیاد دەکات.

 

ڕاگەیێنراوی فەرمی: کۆمپانیای DNOـی نەرویجی لە ڕاگەیێنراوێکدا ئەوەشی خستووەتەڕوو، دوای دوو ساڵ و نیو لە ڕاگرتنی، هەفتەی داهاتوو لە کێڵگەی تاوکێ دەست بە هەڵکەندنی بیرە نەوتی نوێ دەکەن، کە ژمارەیان هەشت بیرە نەوتە و دوو سەکۆی هەڵکەندنی بیرە نەوت بۆ کارکردن تیایاندا تا ساڵی 2026 ئامادە کراوە.

 

باسی لەوەشکردووە، بە تەواوبوونی ئەو هەشت بیرە نەوتە، بەرهەمهێنانی نەوت لە مۆڵەتی تاوكێ کە (هەردوو کێڵگەی تاوکێ و پیشخاپور) لەخۆدەگرێت بەڕێژەی 25% زیاد دەکات، بەجۆرێک ئێستا 80 هەزار بەرمیل نەوت بەرهەم دەهێنن و بە تەواوبوونی ئەو بیرە نەوتانە، ئاستی بەرهەمهێنان بۆ 100 هەزار بەرمیل لە ڕۆژێکدا بەرزدەبێتەوە.

 

کۆمپانیای DNOـی نەرویجی دەشڵێت، سەرەڕای ڕاگرتنی هەناردەی نەوتی کوردستان لە ساڵی 2023 و کەمبوونەوەی داهات، بەڵام کۆمپانیاکەیان تائێستاش ڕۆژانە 80 هەزار بەرمیل نەوت بەرهەم دەهێنێت، باوەڕیشیان بە توانای خۆیان هەیە بۆ زیادکردنی بڕێکی زیاتری بەرهەمهێنان لە کێڵگە مۆڵەتپێدراوەکانی هەرێمی کوردستان.

 

گۆشەیەکی دیکەی دیمەنەکە: دوێنێش دوای دوو ساڵ و نیو لە وەستان، کۆمپانیای گەڵف کیستۆن  کە لە کێڵگەی شێخان کار دەکات، ڕایگەیاند، یەکەم بڕە پارەی فرۆشی هەناردەکردنی نەوتی کێڵگەکەیان وەرگرتووە و ساڵی 2025 ساڵێکی وەرچەرخان بووە، چونکە هەناردەی نەوتی کوردستان بۆ دەرەوە دەستیپێکردووەتەوە.