وەزارەتی دارایی کوردستان لەبارەی مووچەی مانگی یەک ڕوونکردنەوە دەدات: تا ئێستا هیچ بڕیارێک نییە بنێردرێت

ئاڤا نیوز

وەزارەتی دارایی هەرێمی کوردستان ڕوونکردنەوە لەسەر مووچەی ساڵی 2026 دەدات و ڕایدەگەیەنێت، تاوەکو ئێستا هیچ ڕێنماییەکی نوێ لە بەغداوە نەگەیشتووە و وەزارەت ئامادەیە بۆ ناردنی لیستی مووچە.

چیرۆکی سەرەکی: لە چەند ڕۆژی ڕابردوودا دەنگۆ و شیکردنەوەی جیاواز لەبارەی لیستی مووچە و ناردنی 120 ملیار دینارەکە بۆ بەغدا بڵاوکراونەتەوە؛ وەزارەتی دارایی دەیەوێت لەرێگەی ئەم ڕاگەیێنراوەوە ڕێگریی لە یاریکردن بە هەستی مووچەخۆران بگرێت و پەیامێکیشە بۆ بەغدا کە هەرێم چاوەڕوانی ڕێنماییەکانە و هیچ کێشەیەکی تەکنیکیی لە ناردنی لیستەکاندا نییە.

ڕاگەیێنراوی فەرمی: وەزارەتی دارایی و ئابووریی هەرێمی کوردستان ڕایگەیاند: تاوەکو ئێستا لە وەزارەتی دارایی فیدراڵەوە هیچ بڕیار و ڕێنماییەک سەبارەت بە ڕێکارەکانی خەرجکردنی مووچە بۆ ساڵی 2026 نەگەیشتووە؛ هەروەها هیچ ڕێکەوتنێکی نوێ لە ئارادا نییە و وەزارەتمان هاوشێوەی ساڵانی ڕابردوو بەردەوامە لە جێبەجێکردنی هەنگاوەکانی دابەشکردنی مووچە، ڕوونکردنەوەکەشی بە چەند خاڵێک خستووەتە ڕوو؛-

1- تا ئێستا لە وەزارەتی داراییی حکومەتی فیدراڵەوە هیچ بڕیار و ڕێنمایییەک سەبارەت بە ڕێکارەکانی خەرجکردنی مووچە بۆ ساڵی دارایی 2026 نەگەیشتووەتە وەزارەتی داراییی هەرێمی کوردستان.

2- تا ئێستا هیچ ڕێککەوتن و بڕیارێکی نوێ بۆ دابەشکردنی مووچە نییە.

3- وەزارەتی دارایی و ئابووری هەروەک ساڵانی پێشوو بەردەوامە لەسەر جێبەجێکردنی هەموو هەنگاوەکانی دابەشکردنی مووچە.

4- هیچ کێشەیەک لەبەردەم وەزارەتی داراییی حکومەتی هەرێمدا نییە بۆ ناردنی ڕاپۆرتی تەرازووی پێداچوونەوە و لیستی مووچە، وەزارەت چاوەڕێی ئەنجامەکانی خاڵی یەکەمە (واتە بڕیار و ڕێنماییی نوێ بۆ خەرجکردنی مووچە لە ساڵی 2026).

ئەوەی پێویستە بیزانیت: وەزارەتی دارایی لە بەشێکی دیکەی ڕوونکردنەوەکەیدا دەڵێت؛ تکایە هەر کەس و لایەنێک کە شارەزای ئەم ڕێکەوتن، ڕێنمایی و ڕێکارانە نییە، زانیاریی هەڵە لەسەر لیستی مووچە و بابەتی (120,000,000,000) سەد و بیست ملیار دینارەکە بڵاو نەکاتەوە، تا لەو ڕێگەیەوە بیەوێت بۆ دەستکەوتی کەسی یان سیاسی یاری بە هەست و سۆزی فەرمانبەران و مووچەخۆران بکات.