هەسەدە: سوپای سووریا بەردەوامە لە پێشێلکردنی ئاگربەست؛ هێرشەکانی بەردەوامن

ئاڤا نیوز

هەسەدە ڕایگەیاند، لە شەوی ڕابردووەوە، گرووپە چەکدارەکانی سەر بە سوپای عەرەبی سووریا بەردەوامن لە ئامانجگرتنی ناوچە نیشتەجێبووەکانی هەرێمەکانی جەزیرە و کۆبانێ، ئەمەش پێشێلکردنی ئاشکرای بنەماکانی ڕێککەوتنەکەمانە.

ڕاگەیێنراوی فەرمی: ناوەندی ڕاگەیاندنی هەسەدە لە ڕاگەیێنراوێکدا ڕایگەیاند، زنجیرەیەک هێرش لەلایەن چەکدارانی سەر بە سوپای عەرەبی سووریا ئەنجامدراون کە بەمشێوەیە بوون:

٠ کاتژمێر 10ـی بەیانی، هێرشێکی زرێپۆش بۆ سەر میحوەری شارۆچکەی جەلەبیە لە باشووری ڕۆژهەڵاتی کۆبانی تێکشکێنرا.

٠ کاتژمێر شەشی ئێوارە، تۆپخانەکانی ئەو گرووپانە گوندی قاسمیەیان تۆپباران کرد، لە ئەنجامدا منداڵێک شەهید بوو و سێ ئەندامی تری هەمان خێزان بریندار بوون.

٠ کاتژمێر 7:30ـی ئێوارە، هێرشکردنە سەر گوندی قەری لەڕێگەی سێ فڕۆکەی بێفڕۆکەوانی خۆکوژەوە، کە تەنیا زیانی ماددی لێکەوتەوە.

٠ کاتژمێر 10:30ـی شەو،  گوندی سەفا لە شارۆچکەی چل ئاغا کرایە ئامانج و زیانی ماددی لێکەوتەوە.

زانیاریی زیاتر: بەپێی ڕاگەیێنراوەکە، لە ئەنجامی ئەم هێرشانەدا چوار شەڕڤانی هەسەدە برینداربوون، جگە لە شەهیدبوونی منداڵێک و برینداربوونی سێ مەدەنی تر.

داواکاری فەرمی: هەسەدە داوا لە لایەنە ناوبژیوانەکانی ڕێککەوتنی ئاگربەستەکە دەکات و دەڵێت، بەرپرسیارێتی خۆتان هەڵبگرن بۆ ڕاگرتنی ئەم پێشێلکارییانە و ناچارکردنی گرووپەکانی سەر بە دیمەشق بۆ پابەندبوون بە ڕێککەوتنەکە و پاراستنی گیانی مەدەنییەکان بەبێ دواکەوتن.

لەلایەکی دیکەوە: فەرهاد شامی، وتەبێژی هێزەکانی سووریای دیموکرات (هەسەدە) ڕایگەیاند، بەرەبەیانی ئەمڕۆ هێزەکانمان لە گوندی خراب عەشک لە باشووری ڕۆژهەڵاتی کۆبانی، ڕووبەڕووی هێرشێکی زەمینی و تۆپبارانێکی چڕی گرووپەکانی سەر بە دیمەشق بوونەوە.

ئامەژەی بەوەشکرد، ئەم هێرشانە پێشێلکردنێکی ئاشکرای ڕێککەوتنی ئاگربەستی ئەم دواییانەن. هێزەکانی ئێمەش بەردەوامن لە جێبەجێکردنی مافە ڕەواکانیان بۆ بەرگری لە خۆیان و مامەڵەکردن لەگەڵ هێرشە بەردەوامەکان و  دیمەشق بە بەرپرسیار دەزانین لە پێشێلکردنی ڕێککەوتنی ئاگربەست.