مەزڵووم عەبدی: تا دوا دڵۆپی خوێن لەپێناو پاراستنی ڕۆژئاوا دەجەنگین

ئاڤا نیوز

فەرماندەیی گشتیی هێزەکانی هەسەدە، لە نوێترین لێدوانی ڕایگەیاند، تا دوا دڵۆپی خوێن لەپێناو پاراستنی ڕۆژئاوا دەجەنگین، وتیشی بە پێی ڕێککەوتنی 18ـی ئەم مانگە، نابێت هێزەکانی سوپای عەرەبی سووریا بێنە ناوچەکانی ئێمە، عەفرین و سەری كانێ بەشێكی گرنگی ڕێككەوتنەكەن.

چیرۆکی سەرەکی: شەوی ڕابردوو، نوێترین چاوپێکەوتنی تەلەڤیزیۆنی مەزڵووم عەبدی، فەرماندەیی گشتیی هێزەکانی هەسەدە لەبارەی ڕێککەوتنیان لەگەڵ حکومەتی سووریا و پێشێلکارییەکانی سوپای عەرەبی سووریا دوای ئاگربەست، لە میدیای ڕۆژئاوا بڵاو کرایەوە.

لێدوانی ڕۆژنامەوانی: مەزڵووم عەبدی، فەرماندەیی گشتیی هێزەکانی سووریای دیموکرات (هەسەدە) لە بەرنامەیەکی تایبەتدا لەگەڵ میدیای ڕۆژئاوای کوردستان ڕایگەیاند، لەسەر داوای ئەمەریکا ئاگربەستەکەمان درێژکردەوە، بۆ ئەوەی چەکدارانی داعش بۆ عێراق بگوازرێنەوە. گوتیشی: هەوڵدەدەین ئەو ئاگربەستەی لەگەڵ حکومەتی دیمەشق هەیە، بەشێوەیەکی کردەیی کاری بۆ بکەین، هاوکات ئەو هێرشانە دەکرێنە سەر کۆبانێ دەبێت بووەستن.

ئاماژەی بەوەشکرد، بە ڕێککەوتنی 18ـی ئەم مانگە پابەندین، بەڵام ئێستا پەیوەستە بەوەی کەی و چۆن جێبەجێ دەکرێت، هاوکات کار لەسەر ئەوە دەکەین هەندێک ناوەڕۆکی ڕێککەوتنەکە زیاتر ڕوون بکرێتەوە.

زانیاریی زیاتر: لەبارەی یەکێک لە خاڵەکانی ڕێککەوتنەکە، عەبدی وتی: "جگە لە پۆستی پارێزگاری حەسەكە، جێگری وەزیری بەرگری و چەند پۆستێكی دیكەمان داوا كردووە."