چیرۆکەکانی ژێر خێمەکانی ئاڤا

ئاڤا نیوز

هاووڵاتیان پەیتا پەیتا ڕوو لە کامپەینەکەی ئاڤا دەکەن، منداڵەکان بووکەڵەکانیان لەباوەش جیا دەکەنەوە، گەنجەکان لە سەرمادا قەمسەڵەکانیان دادەکەنن، گەورەکان ڕاخەری ژێر خۆیان هەڵدەگرن و دەیانهێنن بۆ کامپەینەکەی ئاڤا، ئۆتۆمبێلەکان ڕیزیان بەستووە بۆ گەیشتن بە خێمەکانی کەمپەینەکە.

چیرۆکی سەرەکی: شەوی ڕابردوو ئاڤا میدیا لەبەردەم ئۆفیسی سەرەکی لە هەولێر، کامپەینێکی گەورەی هاوکاری بۆ زیان لێکەوتووانی لافاوەکەی چەمچەماڵ ڕاگەیاندووە چەندین خێمە بۆ کۆکردنەوەیان دانراون و دوو ڕۆژی دیکە بەردەوام دەبێت، سەدان خێرخواز لە پیاو و ئافرەت، منداڵ و پیر، پارە و پێداویستییەکانی ژیانی ڕۆژانەیان هێناوە، سەدان ئۆتۆمبێل لە نۆرەدان بۆ هێنانی هاوکارییە جۆراوجۆرەکان.

لەکاتی هێنانی هاوکارییەکان دەیان چیرۆکی جوان و سەرنجڕاکێش تۆمار دەکرێن لە نموونەی ئەم چیرۆکانە:

٠ سێ برای بەتەمەن بچووک دەستیان لەناو دەستی یەکترنا و  بڕیاریاندا دەخیلەی پارەکانیان لە ماڵەوە بهێنن بۆ کامپەینەکەی ئاڤا، بەمشێوەیە بەشدارییان لە کامپەینەکە کرد بۆ هاوکاریی لێقەوماوانی لافاوەکە.

٠ کچێکی خاوەن پێداوسیتی تایبەت لەگەڵ باوکی هاتبوو، ئەو جلو بەرگەی بەدەستەکانی خۆی لە سوف چنیبوونی کردییە دیاری بۆ ئافرەتانی چەمچەماڵ.

٠ باوکێک لە کەشوهەوایەکی باراناوی بە ماتۆڕە سێ تایەکەی لەگەڵ کچە بچووکەکەی چەند نەعل، پێڵاو و ڕاخەرێکی هێنا.

٠ چەند گەنجێک چاکەت و قەمسەڵەی خۆیان دانا، یەکێک لەو گەنجانە گوتی بە هاوسەرەکەم گوت ماڵێک بۆ ڕۆژی ڕەش نەبێت بۆ چییە بێنە چی لەماڵەوە هەیە با بیبەین بۆ کامپەینەکە.

٠ بەسەدان منداڵی چاوگەش دیارییەکانی خۆیان هێناوە و کردوویانە دیاری بۆ منداڵانی چەمچەماڵ، بە دەیان بووکەڵە و یاری منداڵان، جانتای قوتابخانە و جلوبەرگی منداڵان لەلایەن منداڵانی هەولێر و دەوروبەری هێنراوە بۆ کامپەینەکە.

کاریگەریی ئاڤا: ئاڤا لەڕێگەی ڕووماڵێکی پیشەییانە و نیشتیمانییانە پاڵپشتی زیان لێکەوتووانی لافاوەکەی قەزای چەمچەماڵ دەکات، بەرنامەی خۆری ئاڤا ئەمڕۆ چووەوە ناو ماڵە هەژار و لێ قەوماوەکان، تۆڕی پەیامنێرانی ئاڤا میدیا لەڕۆژی یەکەمەوە بەردەوامن لە بەسەرکردنەوەی ئەو خێزانانەی لێیان قەوماوە و بەسەریان دەکەنەوە، لەڕیگەخێرخوازانەوە هاوکاری ماڵەکان دەکەن و داوا لە خێرخوازانیش دەکەن هاوکارییەکانی خۆیان بگەیەننە ئاڤا.

ئەوەی پێویستە بیزانیت: تا دێت کامپەینەکەی ئاڤا فراوانتر دەبێت و ژمارەی خێمەکان بەردەوام لە بەردەم ئۆفیسی سەرەکی زیاد دەکات، هەر لە ئاڤا سندووقێکی تایبەت بۆ کۆکردنەوەی پارە دانراوە و خێرخوازان دەتوانن بە کاش پارە بدەن.

خێرخوازان، سەرمایەداران، وەبەرهێنەران چین و توێژە جیاوازەکان،  دەتوانن بە سێ ڕێگای جیاواز هاوکاریی بگەیەننە کامپینەکەی ئاڤا:

ژمارەی پەیوەندی؛

0770 171 8885 

0750 803 5020

لەڕێگەی کیو ئاڕ کۆدی (FIB)

 

٠ گەیاندنی هاوکاری بە ئۆفیسی سەرەکی ئاڤا میدیا لەسەر ڕێگای سەرەکی هەولێر - پیرمام، تەنیشت فیردەوس سیتی.

زیانە سەرەکییەکان: بەهۆی لافاوی چەند ڕۆژی ڕابردوو لە هەرێمی کوردستان زیانەکان بەم شێوەیە بوون:

٠ پێنج کەس گیانیان لەدەستداوە، دوو کەس لە چەمچەماڵ، دوو کەس لە کەرکووک، منداڵێک لە کەلار.

٠ ئەندازیارێک بێسەروشوێنە.

٠ دوو هەزار و 211 خانوو زیانیان بەرکەوتووە.

٠ 215 دووکان و مارکێت زیانیان بەرکەوتووە.

٠ 756 پڕۆژە زیانیان بەرکەوتووە.

٠ لە تەق تەق 189 جووتیار و چوار پڕۆژەی گەشتیاری زیانیان بەرکەوتووە.