کەشناسی کوردستان: ئەمشەو لە سنووری هەولێر بڕێکی زۆر باران دەبارێت

ئاڤا نیوز

بەگوێرەی پێشبینییەکانی بەڕێوەبەرایەتی گشتی کەشناسی و بوومەلەرزەزانی هەرێمی کوردستان ئەمشەو لە نێوان بەحرکە بۆ بەردەڕەش واتا باکووری ڕۆژئاوای شاری هەولێر بڕێکی زۆری باران دەبارێت.

ڕاگەیێنراوی فەرمی: بەڕێوەبەرایەتی گشتی کەشناسی  و بوومەلەرزەزانی هەرێمی کوردستان ڕاگەیاند، هەرێمی کوردستان لەژێر کاریگەری ناسەقامگیری نیمچە لاوازی پەستانی دەریای سپی ناوەڕاست دەمێنێتەوە. بۆیە ئەمشەو و سبەی شەممە بارانی پچڕ پچڕ لەسەرجەم ناوچەکانی هەرێمی کوردستان بەردەوامی دەبێت. لە کاتەکانی بەیانی زوودا ڕێژەیەکی زۆری باران لە باکووری ڕۆژئاوای هەولێر دەبارێت بەجۆرێک دەگاتە 15 ملم باران.

زانیاریی زیاتر: هەر بەپێی پێشبینییەکانی کەشناسی، سبەی ئێوارەی ڕۆژی شەممە شەپۆلەکە کۆتایی دێت.

ئەوەی پێویستە بیزانیت: بڕی باران بارینی پێشبینیکراوی ئەمشەو تا سبەی شەممە بەمجۆرە دەبێت:

٠ سەنتەری هەولێر ئەمشەو تا پێنج ملم بارانی لێ دەبارێت، لە ڕۆژئاوای هەولێر سبەی تا 12 ملم باران دەبارێت.

٠ لە سەنتەری دهۆک ئەمشەو تا 11 ملم باران دەبارێت، سبەی تا شەش ملم باران دەبارێت. لە ئیدارەی سەربەخۆی زاخۆ تا هەشت ملم و سبەی دوو ملم دەبارێت.

٠ لە سەنتەری سلێمانی ئەمشەو تا چوار ملم دەبارێت و سبەی تا 10 ملم دەبارێت. لە ئیدارەی ڕاپەڕین سبەی تا هەشت ملم باران دەبارێت، لە سەنتەری هەڵەبجە و ئیدارەی گەرمیان سبەی تا 10 ملم باران دەبارێت.

٠ لە پارێزگای کەرکووکیش سبەی تا 10 ملم باران دەبارێت.