ئەنجوومەنی گشتیی گەڕەکەکانی شێخ مەقسوود و ئەشرەفییە: سووریا بەردەوامە لە سەپاندنی گەمارۆ

ئاڤا نیوز

هاوسەرۆکی ئەنجوومەنی گشتیی گەڕەکەکانی شێخ مەقسوود و ئەشرەفییە ڕایدەگەیێنێت، حکومەتی کاتیی سووریا بەردەوامە لە سەپاندنی گەمارۆ لەسەر ئەو دوو گەڕەکە لە حەلەب.

 

وێنە گەورەکە: سەرەڕای ڕێککەوتنی نێوان حکومەتی سووریا و بەڕێوەبەرایەتیی خۆسەر لە 1ی نیسانی 2025، لەبارەی گەڕەکەکانی شێخ مەقسوود و ئەشرەفییە لە پارێزگای حەلەب، بەڵام ناوە ناوە ئەو دووگەڕەکە کوردییە لەلایەن هێزەکانی سەر بە حکومەتی سووریاوە گەمارۆی دەخرێتە سەر. 

 

لێدوانی فەرمی: نووری شێخۆ، هاوسەرۆکی ئەنجوومەنی گشتیی گەڕەکەکانی شێخ مەقسوود و ئەشرەفییە، ڕەخنە لە سیاسەتی حکومەتی کاتیی سووریا دەگرێت کە هانی بڵاوکردنەوەی گوتاری پڕ لە ڕق دەدات، هەموو نەیارێکی حکومەت وەک "دوژمن" دەناسێنێت و دابەشبوونە کۆمەڵایەتییەکانیش قووڵتر دەکاتەوە.

 

-شێخۆ ئاماژەی بەوەدا "جیاوازییەک هەیە لە هەڵوێستە نیشتمانییەکان لە نێوان ئیدارەی خۆبەڕێوەبەریی دیموکراتیی باکوور و ڕۆژهەڵاتی سووریا و حکومەتی کاتی، سەبارەت بە بەرپرسیارێتی لەبەردەم یەکڕیزیی وڵات و بەها نیشتمانییەکاندا."

 

ئەوەی ئێستا ڕوودەدات: شێخۆ جەختی لەسەر بەردەوامبوونی گەمارۆی سەر هەردوو گەڕەکەکە کردەوە و ڕایگەیاند، گەمارۆکە کێشەی ئابووری، پیشەسازی، کۆمەڵایەتی، بژێوی و تەندروستی گەورەی دروست کردووە. نوێترینیان لەکارکەوتنی بینای پۆستە لە گەڕەکی ئەشرەفییەیە، کە بەرپرسیارە لە دابینکردنی ئینتەرنێت بۆ چەند گەڕەکێک، بەهۆی نەبوونی سووتەمەنی پێویست بۆ کارپێکردنی کارەبا.