ئێران دەست بەسەر كەشتیەكی نەوتهەڵگر دەگرێت

ئاڤا نیوز

 

لە کەنداوی عومان، ئێران دەستی بەسەر کەشتییەکی نەوتهەڵگردا گرت، کە نزیکەی شەش ملیۆن لیتر سووتەمەنیی قاچاغی تێدابوو.

 

وێنە گەورەکە: لەبەر ئەوەی نرخی سووتەمەنی لە ئێران لەچاو وڵاتانی دیکەی جیهان هەرزانە، بردنەدەرەوەی سووتەمەنی بە قاچاغ لە کەنداوی عومان پەرەی سەندووە، هێزەکانی ئێرانیش بەردەوام هەواڵی دەستبەسەرداگرتنی ئەو گەمییانە بڵاودەکەنەوە کە کاری قاچاغ دەکەن.

 

ڕاگەیێنراوی فەرمی: ئاژانسی هەواڵی فارس لە زاری بەرپرسێک لە پارێزگای هورمزگانەوە بڵاوی کردەوە: دەستیان گرتووە بەسەر کەشتییەکدا کە شەش ملیۆن لیتر سووتەمەنی و 18 دەریاوانی هەڵگرتبوو کە هەڵگری ڕەگەزنامەی وڵاتانی هیندستان، سریلانکا و بەنگلادیش بوون.

 

ئەمەش بزانە: دوو ڕۆژ لەمەوبەر، ئەمریکا لە نزیک کەناراوەکانی ڤەنزوێلا دەستی بەسەر کەشتییەکی نەوتهەڵگردا گرت بە ناوی "سکیپەر"، بەپێی قسەی واشنتۆن، کەشتییەکە نەوتی ئێران و ڤەنزوێلای هەڵگرتبوو و سەر بە سوپای پاسداران بووە.