بەشی ڕۆشنبیری و ڕاگەیاندنی پارتی بە هانای كتێبخانەی ژێرئاوكەوتووی چەمچەماڵەوە دەچێت

ئاڤا نیوز

 

بەشی ڕۆشنبیری و ڕاگەیاندنی پارتی بە هانای كتێبخانەی گشتیی چەمچەماڵەوە دەچێت كە بەهۆی لافاو، دووچاری زیانێكی زۆر بووە؛ بڕیاری دا بە بەخشینی 500 كتێب لەپێناو ئاوەدانكردنەوەی.

 

وێنە گەورەكە: دوای ئەوەی لە چەند ڕۆژی ڕابردوودا، بەهۆی شەپۆڵی بارانبارین و دروستبوونی لافاو و كاریگەرییەكانی بەسەر دەڤەری چەمچەماڵ و شۆڕش و تەكیە، كتێبخانەی گشتیی چەمچەماڵ ژێرئاو كەوت و ڕووبەڕووی زیانی گەورە بووەوە.

 

ڕاگەیێنراوی فەرمی: بەشی ڕۆشنبیری و ڕاگەیاندنی پارتی دیموکراتی کوردستان لە ڕاگەیێنراوێكدا ئاماژەی بەوە كردووە، وێڕای نیگەرانیمان بۆ هاووڵاتیانی پایتەختی شەهیدان و ئەنفال بەهۆی بەركەوتنی زەرەر و زیان بە سەروماڵیان، لە سۆنگەی دڵسۆزیمان بۆ بواری مەعریفە و زانست، نیگەرانین بۆ ژێرئاوكەوتن و زیانگەیشتن بە كتێبخانەی گشتیی چەمچەماڵ.

 

زانیاریی زیاتر: بەشی ڕۆشنبیری و ڕاگەیاندنی پارتی، لەسۆنگەی هەستکردن بە بەرپرسیاریەتیی نەتەوەیی و ڕۆشنبیری بەرامبەر بە شاری چەمچەماڵ و خوێنەرانی ئەو دەڤەرە، بڕیاری دا بە بەخشینی 500 کتێب لەپێناو ئاوەدانکردنەوەی کتێبخانەكە، داواش لە نووسەران و ڕووناكبیرانی كوردستان دەكات، هەریەكەو بەپێی توانای خۆی، بەشداری بكەن و نەهێڵن چرای مەعریفە و كولتوور لەو شارەدا كز بێت.