پڕۆژەی جووتسایدی حاجی ئۆمەران – کەورتە دەستپێدەکات

ئاڤا نیوز

یەکێک لە ستراتیژییەکانی ڕێگا و بان لە سنووری ئیدارەی سەربەخۆی سۆران دەچێتە بواری جێبەجێکردن، کە بەشێکە لەپڕۆژەی دروستکردنی ڕێگای جووتسایدی سۆران - حاجی ئۆمەران، کارە سەرەتاییەکانی پڕۆژەکە دەستیپێکردووە و لە ڕۆژانی داهاتوودا دەست جێبەجێکردنی هەنگاوەکانی دیکە دەکرێت.

چیرۆکی سەرەکی: پڕۆژەی جووتسایدی سۆران - حاجی ئۆمەران بە درێژایی 65 کیلۆمەتر جێبەجێ دەکرێت، ئەم پڕۆژەیە بە چەند قۆناغێک جێبەجێ دەکرێت، سوودێکی زۆری بازرگانی، گەشتیاری و کەمکردنەوەی کاتی گەشتکردنی دەبێت، بەتایبەتی کە ڕێگایەکی نێودەوڵەتیی گرنگە و هەولێر بە تاران دەبەستێتەوە، قۆناغی یەکەمی پڕۆژەکەش جووتسایدی حاجی ئۆمەران – کەورتەیە.

لێدوانی فەرمی: شوان مووسا، بەڕێوەبەری پڕۆژەکان لە ئیدارەی سەربەخۆی سۆران بە ئاڤای گوت، "کۆمپانیای جێبەجێکار، ئێستا سەرقاڵی ڕێکخستنی کەمپەکانن و ڕێڕەوی شەقامەکە دیاریدەکەن، لەماوەی داهاتوو دەست بە جێبەجێکردنی دەکرێت، ماوەی تەواوبوونی دوو بۆ سێ ساڵ دەخایەنێت و ئەگەر هەیە دوای تەواوبوونی ئەو قۆناغە، قۆناغەکانی دواتریش بچنە بواری جێبەجێکردن تا دەگاتە سۆران هەموو ببێتە جووتساید."

گوتیشی، "شەقامەکە بە ستانداردی جیهانی دەبێت، دوو هێڵ و نیو لەخۆدەگریت، دوو هێڵی خێرا و هێڵێک بۆ وەستانی ئۆتۆمبێل، کۆی پڕۆژەکە 29 کیلۆمەترە، ژمارەیەک ئۆڤەرپاس، ئیندەرپاس و تونێل لەخۆدەگرێت."

زانیاریی زیاتر: لە 15 کیلۆمەتری قۆناغی یەکەم دوو تونێلی 300 بۆ 400 مەتری تێدایە دوو شوێنی وەستانی ئۆتۆمبێلی هەیە، یەکێکی لە نزیک حاجی ئۆمەران ئەوەی دیکەیان لە نزیک ڕایات دەبێت.