ئەمریکا ژمارەی ژەنەڕاڵەکانی کەم دەکاتەوە

ئاڤا نیوز

 

ئەمریکا دەست دەکات بە پلانی دووبارە ڕێکخستنەوەی پێکهاتەی هێزی سەربازی وڵاتەکەی، بەپێی سەرچاوەکانیش ئەم هەنگاوە لەسەر داوای وەزیری جەنگی ئەمریکا بووە.

 

زانیاری بەدەستهاتوو: ڕۆژنامەی واشنتن پۆستی ئەمریکی ڕاپۆرتێکی بڵاو کردووەتەوە و تیایدا هاتووە، بەرپرسانی ئەمریکا کار لەسەر پلانێک دەکەن بۆ ئەنجامدانی گۆڕانکاری و ڕێکخستنەوەی هەیكەلی سوپای ئەو وڵاتە. ئەم پلانە لەسەر داوای پیت هێگسێس، وەزیری جەنگی ئەمریکا ئامادە دەکرێت و ئامانج لێی کەم کردنەوەی ژمارەی ژەنەڕاڵە چوار ئەستێرەکان و تێکەڵکردنەوەی چەند فەرماندەییەکی دیکەیە لەگەڵ فەرماندەکانی دیکەدا.

 

زانیاریی زیاتر: ڕۆژنامەکە لە زاری پێنج سەرچاوەی ئاگادارەوە بڵاوی کردووەتەوە، ئەگەر ئەم پێشنیازە پەسەند بکرێت، دەبێتە یەکێک لە گەورەترین و گرنگترین گۆڕانکارییەکان لە بەرزترین ئاستەکانی سوپای ئەمریکا لە ماوەی دەیان ساڵی ڕابردوودا.

 

هۆكارە زانراوەكان: بەشێک لە پلانەکە بریتییە لە: کەم کردنەوەی دەسەڵات و پێگەی فەرماندەیی ناوەندیی ئەمریکا، فەرماندەیی ئەورووپا و فەرماندەیی ئەفریقا و خستنەژێر ڕکێفی ئەم سێ فەرماندەییە بۆ ژێر کۆنترۆڵی دامەزراوەیەکی نوێ بە ناوی فەرماندەیی نێودەوڵەتیی ئەمریکا.

- کەم کردنەوەی ژمارەی ئەو ژەنەڕاڵ و ئەدمیراڵانەی ڕاستەوخۆ ڕاپۆرت دەدەنە وەزیری جەنگی ئەمریکا.

 

ئەمەش بزانە: جێبەجێکردنی ئەم گۆڕانکارییانە پێویستی بە ڕەزامەندیی هەریەک لە وەزیری جەنگ و دۆناڵد ترەمپ، سەرۆکی ئەمریکا هەیە.  

 

باکگراوند: لە مانگی پێنجی ئەمساڵدا، پیت هێگسێس، وەزیری جەنگی ئەمریکا فەرمانی دەرکردبوو بە کەم کردنەوەی ژمارەی ژەنەڕاڵ و ئەدمیڕاڵە چوار ئەستێرەکان لە سوپای ئەمریکادا بە ڕێژەی 20٪.