وەزارەتی ناوخۆی عێراق دەستبەسەر 64 کیلۆ ماددەی هۆشبەر دادەگرێت

ئاڤا نیوز

وەزارەتی ناوخۆی عێراق ڕایگەیاند، بە هاوکاری و هەماهەنگی لەگەڵ لایەنی ئێرانی، توانیویانە دەست بەسەر بڕی 64 کیلۆگرام لە ماددە هۆشبەرە مەترسیدارەکاندا بگرن و تۆمەتبارێکیش دەستگیر بکەن.

وێنە گەورەكە:  ئامارەكانی بەكارهێنان و بازرگانیكردن بە ماددەی هۆشبەر لە عێراق و هەرێمی كوردستان ڕوو لە هەڵكشانن، ژن و منداڵانیش قوربانین، لەنێو ناسنامەی بازرگان و بەكارهێنەری ماددە هۆشبەرەكان ڕەگەزنامەی ئێرانی و سووری بە ڕێژەیەكی بەرچاو هەیە.

لێدوانی فەرمی: وەزارەتی ناوخۆی عێراق ئەمڕۆ پێنجشەممە، 18ی کانوونی یەکەمی 2025، لە بەیاننامەکەدا ڕایگەیاند: "ئەم ئۆپەراسیۆنە گرنگە لە شاری عەبادان ئەنجام دراوە، لەلایەن مەفرەزەیەکی پسپۆڕی سەر بە بەڕێوەبەرایەتی گشتی کاروباری ماددە هۆشبەرەکان، بە هاوکاری تەواو لەگەڵ بەڕێوەبەرایەتی بەرەنگاربوونەوەی ماددە هۆشبەرەکانی ئێران، ئەمەش لە چوارچێوەی هەوڵە هاوبەشەکانە بۆ بەرەنگاربوونەوەی بازرگانیکردن بە ماددەی هۆشبەرەکان. 

هەروەها وەزارەت، جەختی لەوە کردەوە کە "کاری ئەمنیی هاوبەش، لەسەر بنەمای ڕێککەوتننامە و پەیماننامە نێودەوڵەتییەکان لەگەڵ وڵاتانی دۆستدا دامەزراوە، ئەمەش کاریگەری خۆی هەیە لە ڕێگریکردن لە بڵاوبوونەوەی ئەم ژەهرانە کە ئاسایش و سەقامگیری کۆمەڵگە دەکەنە ئامانج".