عەممار حەکیم: پێویستە چەک تەنیا لە دەستی دەوڵەتدا بێت

ئاڤا نیوز

سەرۆکی ڕەوتی حیکمەی نیشتمانی داوا دەکات حکومەتی نوێی عێراق لە ماوەی دەستووری خۆیدا پێکبهێنرێت و چەک تەنیا بەدەستی دەوڵەت بێت.

چیرۆکی سەرەکی: ئەمڕۆ هەینی، عەممار حەکیم بەشداریی مەراسیمی ساڵیادی کۆچی دوایی محەممەد باقر حەکیمی مامی کرد و بەو بۆنەیەوە گوتارێکی پێشکەش کرد و ئاماژەی بەوە کرد، سەرکردەکانی چوارچێوەی هەماهەنگی چالاکانە  بە هاوکاری لەگەڵ هێزە سیاسییەکانی دیکە کار دەکەن بۆ پێکهێنانی حکومەت و داوای کرد کە حکومەتی نوێ بخرێتە بەر تاقیکردنەوەیەکی 100 ڕۆژەی پەیوەستە بە جێبەجێکردنی کارنامەکەی.

پەیامی فەرمی: عەممار حەکیم داوای کرد پەلە بکرێت لە پێکهێنانی حکومەت و ڕێز لە ماوە دەستوورییەکان بگیرێت، دووپاتی کردەوە، "سەرۆکی حکومەتێکمان دەوێت بزانێت چی دەوێت و بەرنامەیەکی ڕوونی هەبێت هاوکات توانای جێبەجێکردنی هەبێت و دەبێت حکومەتی نوێ "تاقیکردنەوەی 100 ڕۆژە" بکات نەک کاری میدیایی، نە نمایشێکی سیاسی، بەڵکو تاقیکردنەوەی ڕژد و بەرپرسیارێتی، لە 100 ڕۆژی یەکەمدا پلانی خزمەتگوزاری بەپەلەی هەبێت دەربارەی کارەبا، قەیرانی دارایی، ئاو، کشتوکاڵ، بێکاریی گەنجان، نەخۆشخانە و دەرمان، قوتابخانەکان و کەرتی پەروەردە و پرسی گەندەڵی کە چۆن ئەوەی مێروولە دار دەخوات ئاوا بودجەی وڵات دەخوات.

گۆشەیەکی دیکەی دیمەنەکە: حەکیم ڕاگەیاند: پێویستە بە چاوی هاوسەنگی سەیری ناوخۆ و دۆخی دەوروبەر بکەین و کێشەکان دەستنیشان بکەین بۆیەش پێویستە چەک تەنیا لەدەستی دەوڵەت بێت بەپێی دەستوور و بانگخوازەکانی مەرجەعیەتی باڵا بۆ ئەوەی یاسا لەسەرووی هەمووانەوە بێت، یاسایەک کە دەبێت بە ئیرادەی عێراقییەکان جێبەجێ بکرێت نەک دەستوەردانی دەرەکی، چەکی دەرەوەی دەسەڵاتی دەوڵەت ڕەتدەکەینەوە هەروەها قبوڵی ناکەین ئەم بابەتە بۆ گوشارکردنە سەر ئێمە و برایانمان بەکار بهێنرێت.