سەرۆککۆمار داوای خێراکردنی هەنگاوەکانی پێکهێنانی حکومەت دەکات

ئاڤا نیوز

د. عەبدولەتیف ڕەشید داوا دەکات لایەنەکان پابەندی وادە دەستوورییەکان بن بۆ پێکهێنانی کابینەی نوێی حکومەتی عێراق.

چیرۆکی سەرەکی: ئەمڕۆ شەممە 20-12-2025، لە بەغدا و بە ئامادەبوونی سەرۆککۆمار و سەرۆکوەزیران، ڕێوڕەسمی ساڵیادی شەهیدبوونی ئایەتوڵڵا محەممەد باقر حەکیم بەڕێوەچوو. لەو یادەدا سەرۆککۆمار جەختی لە گرنگیی ڕۆڵی ئەو کەسایەتییە لە ڕووبەڕووبوونەوەی دیکتاتۆریدا کردەوە.

لێدوانی فەرمی: د. عەبدولەتیف ڕەشید، سەرۆککۆماری عێراق ڕایگەیاند: "بەرپرسیارێتیی نیشتمانی و ئەخلاقی وای لێمان دەخوازێت هەمیشە قوربانییەکانی شەهیدان و زانایان بەبیر بهێنینەوە و چیرۆکی پاڵەوانێتییەکانیان بۆ نەوەکانی داهاتوو بگوازینەوە؛ پێویستیشە هەموو لایەنەکان پابەندی وادە دەستوورییەکان بن بۆ پێکهێنانی حکوومەت".

- سەرۆککۆمار ئاماژەی بەوەش کرد، عێراق قۆناغە سەختەکانی توندوتیژی و تیرۆری تێپەڕاندووە و گەیشتووەتە دۆخێکی ئارام و سەقامگیر، بۆیە ئەرکی هەمووانە کار بۆ بەردەوامبوونی ئەو سەقامگیرییە بکەن.

ئەمەش بزانە: دوای ئەنجامدانی هەڵبژاردنێکی سەرکەوتوو کە تێیدا گەلی عێراق پابەندیی خۆی بە بنەماکانی دیموکراسی نیشان دا، ئێستا پێکهێنانی دامەزراوەکانی یاسادانان و جێبەجێکردن بە ئەولەویەتی قۆناغەکە دادەنرێت.