لەم هەفتەیەدا فەرمانبەرانی یونامی عێراق جێدەهێڵن

ئاڤا نیوز

 

بەرپرسێکی نێردەی نەتەوەیەکگرتووەکان بۆ عێراق (یونامی) بە ئاڤای ڕاگەیاند، دوای ئەوەی بارەگای یونامی لە بەغدا بە فەرمی ڕادەستی حکومەتی عێراق کرایەوە، لەم هەفتەیەدا فەرمانبەرانی نێودەوڵەتیی یونامی، عێراق جێدەهێڵن.

 

ئەوەی پێویستە بیزانیت: یونامی لە عێراق 648 فەرمانبەری هەبوو کە 251 یان فەرمانبەری نێودەوڵەتی بوون و 397ـی دیکەشیان فەرمانبەری ناوخۆیی عێراق بوون، لەگەڵ نزیکبوونەوەی داخستنی نێردەکەش ژمارەی فەرمانبەرەکانی بۆ کەمتر لە 126 کەس کەم بووەتەوە، لە 31ـی ئەم مانگەشەوە هیچ فەرمانبەرێکی هەمیشەیی نێردەکە لە عێراقدا بوونی نامێنێت.

 

زانیاریی بەدەستهاتوو: بەرپرسێکی باڵای یونامی کە سەرۆکایەتیی نێردەکەی لە ناوچەکە کوردستانییەکانی دەرەوەی ئیدارەی هەرێمی کوردستان دەکرد، ئەمڕۆ شەممە بە ئاڤای ڕاگەیاند، ئەو فەرمانبەرە نێودەوڵەتییانەی کە لە چوارچێوەی کارەکانی یونامی لە عێراق بوون، لە ئێستادا کارەکانیان تەواو بوو و بارەگاکانیشیان ڕادەستی حکومەتی عێراق کردووەتەوە.

 

وتیشی، فەرمانبەرانی نێودەوڵەتیی یونامی لەم هەفتەیەوە و بە قۆناغ عێراق جێدەهێڵن، لەگەڵ ئەوەشدا و بە ئامانجی بەردەوامیی پڕۆژەکانی گەشەپێدان، بەبەردەوامی لەگەڵ ڕێكخراوەکانی سەر بە نەتەوە یەکگرتووەکان لەسەر هێڵ دەبن.

 

ئەمەش بزانە: سەرلەبەیانیی ئەمڕۆ شەممە یونامی ڕایگەیاند، بەڵگەنامەکانی ڕادەستکردنی کەمپی سەرەکی خۆی لە بەغدا بە حکومەتی عێراق واژۆ کرد، پێش کۆتاییهاتنی وادەی ئەرکی نێردەکە لە 31ی کانوونی دووەم.