ئوردن بەشداریی خۆی لەگەڵ ئەمریکا لە هێرشکردنە سەر داعش لە سووریا ڕاگەیاند

ئاڤا نیوز

سوپای ئوردن ڕایدەگەیێنێت، بەشدارییان کردووە لەو هێرشەی ئەمریکا کردیە سەر پێگەکانی ڕێکخراوی تیرۆریستیی داعش لە باشووری سووریا.

 

چیرۆکی سەرەکی: سوپای ئەمریکا هێرشێکی بەرفراوانی بۆ سەر دەیان ئامانجی داعش لە سووریا ئەنجام دا و دۆناڵد ترەمپ، سەرۆکی ئەمریکاش هێرشەکە وەک "تۆڵەسەندنەوەیەک" ناو دەبات.

 

ڕاگەیێنراوی فەرمی: بەگوێرەی ڕاگەیێنراوی سوپای ئوردن، "بەرەبەیانیی ڕۆژی هەینی، هێزی ئاسمانیی شاهانەی ئوردن چەندین هێرشی ئاسمانیی وردی ئەنجام دا و تێیدا ژمارەیەک ئامانجی تاقمی تیرۆریستیی داعشی لە ناوچەکانی باشووری سووریا پێکاوە."

 

زانیاریی زیاتر: هەر بەگوێرەی ڕاگەیێنراوەکە، ئەم بەشدارییە بە هەماهەنگی لەگەڵ ئەمریکا و لە چوارچێوەی ئۆپەراسیۆنەکانی هاوپەیمانیی نێودەوڵەتیی دژی داعش ئەنجامدراوە، کە حکومەتی سووریاش بەم دواییانە چووەتە ناو ئەو هاوپەیمانییە.

 

لەهەمان کاتدا: سوپای ئوردن دەڵێت: ئەم ئۆپەراسیۆنە لە چوارچێوەی جەنگی دژی تیرۆر و بۆ ڕێگریکردنە لە گرووپە تووندڕەوەکان کە ئەو ناوچانە وەک خاڵی دەسپێک بۆ هەڕەشەکردن لە ئاسایشی وڵاتانی دراوسێ و ناوچەکە بەکارنەهێنن؛ بەتایبەت دوای ئەوەی ڕێکخراوی داعش لە باشووری سووریا جارێکی دیکە خۆی ڕێکخستووەتەوە و خەریکی بونیادنانەوەی توانا سەربازییەکانی بووە.

 

لەلایەکی دیکەوە: پیت هیگسێس، وەزیری جەنگی ئەمریکا، ئەمڕۆ شەممە ڕایگەیاند، هێزەکانی وڵاتەکەی ڕۆژی هەینی ئۆپەراسیۆنی "چاوی باز"یان لە سووریا دەستپێکردووە و تێیدا چەکدارانی داعشیان کردووەتە ئامانج، ئاماژەی بەوەش کرد کە ئۆپەراسیۆنەکە بەردەوام دەبێت.