کارەبای کۆمەڵگەی قەدش لە ئامێدی دەکرێتە 24 کاتژمێری

ئاڤا نیوز

ئاڤا میدیا بەدەم داواکاریی دانیشتووانی کۆمەڵگەی قەدشی سەر بە قەزای ئامێدییەوە دەچێت و پرۆژەی ڕووناکی دەگەیێنرێتە ئەو شوێنە و کارەبایان دەکرێتە 24 کاتژمێری.

 

چیرۆکی سەرەکی: شەوی ڕابردوو بۆ داواکردنی مافە خزمەتگوزارییەکانیان دانیشتووانی کۆمەڵگەی قەدش- سەر بە قەزای ئامێدی گردبوونەوە و یەکێک لە داواکارییە سەرەکییەکانیان پرۆژەی ڕووناکی و کارەبای 24 کاتژمێری بوو، لەکاتی گردبوونەوەکە پەیامنێری ئاڤا چووە ناو خەڵک و دەنگیانی بە لایەنی پەیوەندیدار گەیاند.

 

لێدوانی فەرمی: ئەردەلان شوکری، بەڕێوەبەری گشتیی دیوان لە وەزارەتی کارەبا بە ئاڤای گوت، "بەگوێرەی پلانی وەزارەتی کارەبا، پێش کۆتایی ساڵی 2026 کارەبای سەرجەم قەزا، ناحیە، گوند و کۆمەڵگەکان دەکرێت بە 24 کاتژمێری.

 

گوتیشی کۆمەڵگەی قەدش لە پلانی وەزارەت دەبێت و لە "ماوەی داهاتوو بەگوێرەی هەلومەرجەکە ڕێککارەکانی گەیاندنی کارەبای 24 کاتژمێری لەو ناوچەیە جێبەجێ دەکەین".

 

ئەمەش بزانە: دوای گردبوونەوەکە، ئەمڕۆ هاوکارمان سورەیا هەساری و تیمی ئاڤا میدیا، سەردانی کۆمەڵگەی قەدشیان کرد و لەلایەن دانیشتووانی ئەو ناوچەیە بە گەرمی پێشوازییان لێکرا، لە ناوەندی کۆمەڵگەکە، تیمەکە گوێی لە داواکاری و گلەییەکانی هاووڵاتییان گرت. تیمی ئاڤا پێی ڕاگەیاندن کە لەبارەی کارەباوەش مژدەی خۆشیان پێدەگات.