سوپای عێراق وردەکاریی ئۆپەراسیۆنەکەی نێو خاکی سووریا ئاشکرا دەکات

ئاڤا نیوز

فەرماندەیی ئۆپەراسیۆنە هاوبەشەکانی عێراق ئاشکرای کرد، ئۆپەراسیۆنەکەی ئەم دواییەی نێو خاکی سووریا لە قووڵایی 10 کیلۆمەتر ئەنجامدراوە و ڕەتیکردەوە پەیوەندیی بە هێرشە ئاسمانییەکەی دوێنێی ئەمریکا بۆ سەر داعش بێت لە شاری دێرەزۆر.

چیرۆکی سەرەکی: هێزێکی ئاسمانی سەر بە شانەی "فالکۆنەکانی هەواڵگری" لە دەزگای هەواڵگری و لێکۆڵینەوەی فیدراڵی سەر بە وەزارەتی ناوخۆی عێراق بە "ڕێنمایی و سەرپەرشتیی فەرماندەی گشتی هێزە چەکدارەکان" ئۆپەراسیۆنێکی "دابەزینی ئاسمانی" بە هاوکاریی هێزە ئەمنییەکانی سووریا و هاوپەیمانیی دژی داعش لە سووریا ئەنجامدا و دوو تۆمەتباری داعشیان دەستگیر کرد.

لێدوانی فەرمی: قەیس محەممەداوی، جێگری فەرماندەی ئۆپەراسیۆنە هاوبەشەکانی عێراق ڕایگەیاند: "ئۆپەراسیۆنی دابەزینی ئاسمانی عێراق لە سووریا لەسەر بنەمای هەواڵگریی وردی شانەی فالکۆن لە دەزگای هەواڵگریی ناوخۆ بوو و دوای چەند هەفتەیەک چاودێریی ئەو ئامانجانە کراوە. لە ئەنجامدا ئەو داواکراوە گرنگانە لە قووڵایی نزیکەی 10 کیلۆمەتر لە ناو خاکی سووریا دەستگیرکراون لە ئۆپەراسیۆنەکەدا هەماهەنگی لەگەڵ هاوپەیمانان کراوە".

ئەوەشی ئاشکرا کرد، لە ئێستادا هەماهەنگی مەیدانیمان هەیە لەسەر ئاستی فەرماندە و سەرکردەکان لەسەر سنووری عێراق و سووریا، کە بریتییە لە ئاڵوگۆڕی زانیاری و ڕادەستکردنی کەسانی داواکراو و ڕێگریکردن لە ئۆپەراسیۆنەکانی دزەکردن. بەڵام ئەم هەماهەنگییە هێشتا نەگەیشتووەتە ئاستێکی بەرزتر لەگەڵ سەرکردایەتی ئەمنی وەکو وەزارەتی بەرگری، ناوخۆ و دامەزراوەکانی دیکە.

گۆشەیەکی دیکەی دیمەنەکە: بەگوێرەی ڕوانگەی سووری بۆ مافەکانی مرۆڤ، شەوی ڕابردوو فڕۆکە جەنگییەکانی ئەمریکا چەند پێگەیەکی داعشیان لە پارێزگای دێرەزوور کردووەتە ئامانج و پێنج ئەندامی داعش کوژراون و یەکێکیان سەرکردەیە، سەبارەت بەم ئۆپەراسیۆنە محەممەداوی ڕەتیکردەوە، ئۆپەراسیۆنەکەی ئەم دواییەی عێراق پەیوەندیی بەم هێرشەی ئەمریکاوە بێت و ڕایگەیاند: تەنانەت شوێنی جوگرافییەکەی جیاوازە.